Fagurfræðilegir nytjahlutir

„Það er eitthvað fallegt við það að annað okkar hafi unnið í hörð efni eins og stál og steypu og hitt í mjúk. Ég vil meina að við séum killerkombó, “ segir Baldur Björnsson, mynd- og raftónlistarmaður, en hann skipar hönnunartvíeykið And Anti Matter ásamt Þóreyju Björk Halldórsdóttur fatahönnuði.

Baldur og Þórey frumsýna línu skúlptúrískra nytjahluta á komandi HönnunarMars sem urðu til eftir samvinnu þeirra við jóladagatal Hönnunarmiðstöðvar.

„Okkur hafði lengi langað til að vinna saman þegar við vorum fengin til að hanna jóladagatalið. Meðfram því hönnuðum við einnig sýningar- og sölurými í miðstöðinni og hluti inn í það. Í þeirri vinnu urðu til prótótýpur að áhugaverðri, mögulegri línu sem við kynnum nú á HönnunarMars,“ útskýrir Baldur.

„Við köllum þetta skúlptúríska nytjahluti, hlutir sem ganga upp fagurfræðilega og hægt er að líta á sem skrautmuni en hafa innbyggða funksjón. Við sýnum fatahengi, ljós og eins konar fjölnota stykki sem hægt er að raða upp á mismunandi hátt og nota undir blóm, smáhluti og jafnvel kökur. Efnið er stál og steinsteypa sem við síðan málum og vinnum áferðir á og einnig korkur. Ljósin eru neonljós, líkt og eru í skiltum.“

Hver hlutur kemur til með að verða framleiddur eftir pöntun. Baldur segir þau Þóreyju ekki líta á takmarkaða framleiðslugetu á Íslandi sem hindrun heldur tækifæri.

„Framleiðslugeta á Íslandi er lítil og kallar því á ákveðna sköpun. Við höfum sóst eftir því að vinna með smærri verksmiðjum og leyfum ferlinu að ráða niðurstöðunni. Litirnir fara til dæmis eftir því hvaða litaskala Pólýhúðun vinnur með, hæfa þeir? Þarf að endurhugsa eitthvað? Það verður ákveðin víxlverkun og eitthvað nýtt verður til. Við lítum ekki á það sem veggi heldur sem stökkpall að nýjum útfærslum.

Það sem okkur finnst einnig svo fallegt við þessi litlu verkstæði með sérhæfða þekkingu er að það er svo auðvelt að leita til þeirra. Maður er strax kominn inn á gólf í verksmiðjunni, þar verður til samtal og fólk miðlar sinni sérþekkingu. Slík nærsamvinna er gefandi,“ segir Baldur.

Viðburður And Anti Matter á HönnunarMars kallast Áður óútgefið og stendur dagana 24.-26. mars. Sýningin fer fram í einni minnstu verksmiðju í Reykjavík.

„Við sýnum í Kolburstaverksmiðjunni Kóral sf. á Vesturgötu 55 en hún hefur starfað í 55 ár. Ég tengist þessari verksmiðju því afi minn stofnaði hana. Afi er hættur en sá sem tók við var svo vinsamlegur að leyfa okkur að nota hana sem sýningarrými.“