Sérkennilegt klapp Nicole Kidman vekur mikla athygli

Óskarsverðlaunin voru afhend við hátíðlega athöfn í Dolby leikhúsinu í Hollywood í gærkvöldi. Ýmis eftirminnileg atvik áttu sér stað á hátíðinni í ár en meðal annars var ranglega tilkynnt um verðlaun fyrir bestu kvikmyndina.

Eitt af þeim atvikum sem mikið hefur verið rætt um á samfélagsmiðlum eftir hátíðina er sérkennileg aðferð áströlsku leikkonunnar Nicole Kidman við að klappa en myndband af henni hefur farið eins og eldur í sinu um netheima.

Hin 49 ára Kidman var tilnefnd sem besta leikkona í aukahlutverki fyrir hlutverk sitt í kvikmyndinni Lion. Hún fór hins vegar tómhent heim en það var Viola Davis sem bar sigur úr býtum í þeim flokki fyrir leik sinn í kvikmyndinni Fences.