Forsætisráðherra Póllands á sjúkrahús eftir árekstur

Beata Szydlo, forsætisráðherra Póllands, var flutt á sjúkrahús eftir að ekið var á ráðherrabíl hennar í gær. Meiðsli Szydlo munu vera minniháttar, en hún mun eitthvað dvelja áfram á sjúkrahúsinu þar sem fylgst verður með líðan hennar.

SVT hefur eftir talsmanni hennar, Rafal Bochenek, að ekki sé ljóst hvort að hún muni mæta á ríkisstjórnarfund sem fyrirhugaður er á þriðjudag. Forsætisráðherrann mun sinna ráðherraskyldum sínum frá sjúkrahúsinu að sinni.

Að sögn Bochenek var var bíl ekið á limmósínu Szydlo sem hafnaði síðar á tré í heimabæ hennar, Oswiecim, skammt frá Krakow. Segir hann að um óhapp hafi verið að ræða.