Þaki á kostnað sjúklinga seinkar og verður 70 þúsund

Framkvæmdastjóri Krafts styrktarfélags segir boðað 70 þúsund króna þak á eigin kostnað sjúklinga ennþá of hátt. Í öðrum Evrópuríkjum beri krabbameinssjúkir ekki svona háan kostnað.

Margar sorgarsögur hafa verið sagðar af kostnaðarþátttöku sjúklinga í íslenska heilbrigðiskerfinu. Eiginmaður konu sem fréttastofan hefur rætt við hefur glímt hefur verið erfitt og langvinnt krabbamein.  Á síðasta ári var beinn lyfja- og sjúkrakostnaður þeirra hjóna 700 þúsund krónur vegna meðferðar mannsins.

Við sögðum ykkur frá 38 ára konu í síðustu viku. Einstæðri móður, öryrkja með þrjú börn en saga hennar rataði í þingræðu Bjartar Ólafsdóttur í fyrra. Á þeim tíma hafði konan greitt 250 þúsund kónur vegna eigin meðferðar. Hún lést seint á síðasta ári eftir langvinna og erfiða baráttu við sinn sjúkdóm.

Hestamenn komu sjóðnum til bjargar

Neyðarsjóður Krafts, styrktarfélags ungs fólks með krabbamein, tæmdist næstum því á síðasta ári. Ástæðan var þung fjárhagsleg byrði krabbameinssjúklinga sem þurftu að bera kostnað vegna eigin meðferðar. Það voru áhugamenn um hrossarækt sem komu sjóðnum til bjargar með fjárframlögum á Landsmóti hestamanna.

Alþingi samþykkti á síðasta ári breytingar á lögum um sjúkratryggingar sem heimiluðu ráðherra að setja þak á eigin kostnað sjúklinga með reglugerð. Lögin áttu að taka gildi 1. febrúar en gildistöku þeirra var frestað til 1. maí.

Lilja Alfreðsdóttir spurði Óttarr Proppé heilbrigðisráðherra út í kostnaðarþáttöku sjúklinga á Alþingi fyrir helgi. „Í greiðsluþátttökukerfi fyrir læknisþjónustu sem við erum að taka í gagnið núna 1. maí verður þakið sett í reglugerð. Það er alla vega ljóst að annars vegar erum við að miða við þak sem verður einhvers staðar á þessu bili, 50–70.000, fyrir almenna einstaklinga, en síðan mikið lægra þak fyrir börn, aldraða og öryrkja,“ sagði Óttarr í svari sínu. Talan sem Óttar nefndi er fengin úr reglugerðardrögum. 

Ragnheiður Davíðsdóttir framkvæmdastjóri Krafts segir þetta spor í rétta átt.

„Þetta er auðvitað spor í rétta átt en 70 þúsund á ári eru heilmiklir peningar fyrir fólk sem á ekki mikla peninga. Síðan þarf að hafa hugfast að þessi fjárhæð byrjar aftur að safnast upp á nýju almanaksári og það eru ekki lyf inni í þessari upphæð. Og þau eru mjög kostnaðarsöm,“ segir Ragnheiður.

Hún nefnir aðrar Evrópuþjóðir. Íslendingur sem greindist með krabbamein í Frakklandi og fékk meðferð þar þurfti ekki að greiða neitt, ekki eina evru vegna eigin meðferðar. Íslendingur sem greindist í Skotlandi fékk allan lækniskostnað greiddan og fékk krem afhent í Apóteki án kostnaðar.

Vill sjá þakið í settum lögum

Ragnheiður gerir einnig athugasemdir við að þakið sé sett í reglugerð en ekki sett lög Alþingis. „Þessi reglugerð, sem nú er verið að setja, stoppar eitthvað upp í götin en hún er engan veginn nægileg að okkar mati. Ég velti því líka fyrir mér hvort endalaust sé hægt að setja reglugerðir sem brjóta í bága við stjórnarskrá, önnur mannréttindaákvæði og lög um málefni sjúklinga.“

Það hefur verið gagnrýnt að þakið hafi verið sett í reglugerð en ekki settum lögum. Meðal annars með þeim rökum að ráðherra hafi ekki heimild til að mæla fyrir um umfang og takmörk réttindaskerðingar sjúklinga í reglugerð í ljósi fyrirmæla 76. gr. stjórnarskrárinnar um réttinn til aðstoðar vegna sjúklinga sem leggur athafnaskyldu á herðar ríkisvaldsins.