Stígamót fagna afmæli og baráttudegi kvenna

Í dag halda Stígamót upp á baráttudag kvenna og um leið 27 ára afmæli sitt. Samtökin hófu starfsemi sína á þessum degi árið 1990. Haldið verður upp á afmælið með sama hætti og venjulega, og þó.

„Það er alltaf opið hús hjá okkur frá fjögur til sex. Þar verður allt okkar vinafólk og velunnarar. Við erum að opna heimili okkar fyrir þeim sem vilja fagna með okkur.

Við höfum oftast haldið blaðamannafund þennan dag og kynnt ársskýrsluna okkar með niðurstöðum liðins árs en sú sem sá um tölfræðihlutann í ár slasaði sig því miður, svo okkur seinkar og við munum kynna skýrsluna sextánda mars og halda fjölmiðlafundinn þá,“ segir Guðrún Jónsdóttir, talskona Stígamóta. Það er ýmislegt fram undan í því góða starfi sem er sinnt hjá Stígamótum.

„Það er alltaf eitthvað fram undan hjá okkur – alþjóðastarfið er fyrirferðarmikið. Við erum meðal annars að fara að halda norræna ráðstefnu hérna heima í haust ásamt Kvennaathvarfinu, þetta verður tvö til þrjú hundruð manna ráðstefna. Það er vegna þess að við erum hluti af Norrænu kvennaathvarfahreyfingunni. Þessi ráðstefna verður hér á landi í fjórða skiptið og við munum vanda okkur eins og við framast getum.

Við erum líka að auglýsa eftir fólki því að það varð sprenging í aðsókn eftir að við fórum í fjáröflunar- og vitundarvakningarátakið okkar síðasta haust. Það gekk nógu vel til þess að við getum fjölgað í starfsliðinu, en það kom okkur á óvart hversu gífurlega aðsóknin jókst í kjölfar þessarar umfjöllunar. En við förum betur yfir það þegar ársskýrslan verður kynnt.

Við erum líka að skilgreina áherslumál fram undan og eitt af því sem okkur langar að vinna meira með er unglingar – hvers kyns kynferðisofbeldi gagnvart unglingum, ekki síst gagnvart þeim unglingum sem eru ekki orðnir átján ára og geta þannig ekki sótt sér hjálp án þess að foreldrar og barnaverndaryfirvöld þurfi að vita af því, sem verður svo til þess að þau sækja sér ekki hjálp. Þetta eru svona vangaveltur sem við erum með. Það þarf að skoða það og ræða hvernig við getum leyst það.“

Húsið verður opnað klukkan fjögur og eru allir velkomnir í kaffi, spjall og kruðerí.