Hófí með litla kórónu sjarmeraði Berglindi upp úr skónum

Fjölmiðlakonan Berglind Pétursdóttir eignaðist nýverið sinn fyrsta hund. Um St. Bernard-hund er að ræða en þeir verða gjarnan á bilinu 65-120 kílóa þungir. Berglind segir hundaævintýrið fara vel af stað.

„Hún heitir Hófí og við fengum hana fyrir um tveimur vikum. Hún er hreinræktaður St. Bernard en það eru ekkert rosalega margir þannig hundar á Íslandi,“ segir Berglind spurð út í nýja fjölskyldumeðliminn. „Hún var komin með eitthvert heimili sem klikkaði af einhverjum ástæðum og þá auglýsti ræktandinn hana á Facebook og birti mynd af henni með litla kórónu,“ segir Berglind og hlær. „Og við hringdum strax í ræktandann og þetta var svo ákveðið á svona 24 tímum,“ útskýrir Berglind sem tók ákvörðunina með kærustu sinni, Lilju Líf. „Þetta stóð ekkert til hjá okkur, að fara út í eitthvað svona.“

Það krefst mikillar vinnu að taka að sér nýjan hvolp en Berglindi og Lilju hefur tekist að púsla öllu vel saman. „Lilja byrjar oftast að vinna aðeins seinna en ég, þannig að Hófí er aldrei lengi ein heima,“ segir Berglind.

Hundurinn og sonurinn góð saman

Spurð út í hvort hvolpauppeldið sé mikið vesen segir Berglind: „Jú, það er náttúrulega ótrúlega mikið vesen að vera með hvolp sko. Miklu meira vesen heldur en að vera með lítið barn,“ segir hún og hlær.

Já, er það málið? „Já, það er smá málið þessa dagana. En þetta er samt alltaf að verða betra og betra með hverjum deginum. Hún er að læra að pissa úti og svona.“

Berglind segir Hófí þó vera stillta og góða. „Þetta er svo róleg tegund, ef hún er með nóg af dóti og beinum þá er hún ekkert upp um allt. Hún er t.d. búin að vera að hitta aðra hunda sem eru á hennar aldri og aðeins eldri og þeir eru alveg tjúllaðir og hlaupandi út um allt á meðan hún situr bara og lætur þá hamast í sér.“

„Þetta er náttúrulega draumategund allra sem hafa séð Beethoven-myndirnar,“ segir Berglind og skellir upp úr þegar hún er spurð hvort þetta hafi verið hennar draumahundategund. „En fólk leggur kannski ekkert alveg í þetta. En kærastan mín er vön stórum hundum, hún hefur átt Stóra Dana og fleiri tegundir. En ég hef aldrei átt hund þannig að ég hlýði bara öllu sem hún segir,“ segir Berglind sem heillaðist líka af tegundinni þegar hún sá myndbandið við Brennum allt með hljómsveitinni Úlfur Úlfur.

„Mamma hennar og tveir aðrir voru í Úlfur Úlfur myndbandinu, að keyra í blæjubíl með Kött Grá Pjé. Eftir að hafa séð það myndband og hugsaði ég, „Vó! Hvar eru þessir hundar?“ því maður sér þá aldrei á labbi. Þannig að ég myndi segja að þetta væri frekar geggjuð tegund!“

Berglind, sem á einn son, segir St. Bernard-tegundina vera í eðli sínu barngóða. „Við tókum maraþonhelgi áður en Hófí kom til okkar með stráknum mínum sem er 6 ára og horfðum á allar Beethoven-myndirnar. Þá spurði hann: „Er hún að fara að vera svona óþekk?“ En þau eru svo fáránlega góð saman, það er algjört rugl. Þessir hundar eru algjörar barnagælur.“

 

Túristarnir ólmir í Hófí

Berglind segir Hófí vekja athygli hvar sem hún fer. „Það er mjög gaman að sjá hvernig túristarnir þurfa margir að stoppa og klappa. Við erum búin að reyna að labba Laugaveginn nokkrum sinnum en við komumst aldrei langt. Maður þarf stundum að halda á henni og strunsa fram hjá fólki ef maður þarf að mæta eitthvert á réttum tíma. En það þýðir ekkert að pirra sig út af því, hún er náttúrulega mjög mikið krútt!“

Berglind er greinilega himinlifandi með nýjasta fjölskyldumeðliminn. „Já, það gengur svo vel. Þetta er frekar geggjað. Ég sé allavega ekki eftir þessu.“