Hneykslar vinkonurnar

Lena hefur alltaf haft mikinn áhuga á straumum og stefnum í tískuheiminum en hún lærði hárgreiðslu og útskrifaðist frá Tækniskólanum fyrir tæpum sex árum. Fljótlega eftir útskrift keppti hún í hárgreiðslu fyrir hönd Íslands í WorldSkills sem er heimsmeistarakeppni iðn- og verkgreina og náði ágætum árangri.

„Mér finnst ekkert eins skemmtilegt og að búa eitthvað til með höndunum, hvort sem það tengist hári, fatahönnun eða teiknun. Hárgreiðslan er mitt aðalstarf en ég var ákveðin í því strax sem lítil stelpa að verða hárgreiðslukona. Undanfarið hef ég líka verið að hanna föt í samstarfi við þrjá aðra. Fatalínan heitir Riptide en auk mín eru það Stefán John Turner, Ásgeir Örn Eyjólfsson og Arnar Þorri Sigþórsson,“ segir Lena, sem vinnur á hársnyrtistofunni Blondie í Mörkinni.



Riptide fatalínan hefur vakið töluverða athygli og þau hafa selt flíkur til Bandaríkjanna og Bretlands og fyrirhugað er að kynna fatalínuna hérlendis innan skamms.

 

Vinkonurnar ýmsu vanar

Lena hefur gaman af því að blanda saman alls konar stíl þegar kemur að fatavali. „Það fer eftir því í hvernig skapi ég er, hvernig ég klæði mig. Ég myndi segja að ég hafi minn eigin stíl, ég er óhrædd við að prófa ýmsar samsetningar og hef mjög oft hneykslað vinkonur mínar sem hrista stundum hausinn yfir mér. Þær eru þó orðnar ýmsu vanar.“

Hún segir sinn helsta veikleika þegar kemur að tísku og útliti að hún geti verið dálítið sein að taka sig til. Henni finnst gaman að kaupa föt en heldur þó ekki upp á neitt sérstakt fatamerki. „Ég er ekkert merkjafrík. Ég kaupi það sem mér finnst fallegt og þægilegt, sama hvað það heitir, þannig að það er allur gangur á því hvar ég kaupi fötin mín. Ég hef verið mikið úti í London og verslað aðeins í Primark og H&M eins og hver annar Íslendingur en uppáhaldsbúðirnar mínar eru Corner Shop í Smáralind, en ég elska að fara þangað og fæ hvergi betri þjónustu, Gyllti kötturinn, Bershka og Topshop í London.“

Uppáhaldsflík Lenu er úlpa úr Gyllta kettinum sem er bæði falleg og þægileg og heldur vel á henni hita yfir kaldan veturinn. Lena segist ekki nota aðra fylgihluti dagsdaglega en hringana sína og Marilyn Monroe er efst á listanum yfir tískufyrirmyndirnar.