Lærði macramé á YouTube

Hjónin Ninna Stefánsdóttir og Pálmi Ketilsson búa til heimilisvörur með macramé-hnýtingum undir heitinu MARR. Áhugamál sem vatt hratt upp á sig og varð að ástríðu.



„Mig langaði í hnýtt vegghengi fyrir ofan rúmið okkar. Hengin sem mig langaði í á netinu kostuðu þó talsvert og þar ofan á kom svo sendingarkostnaðurinn. Ég ákvað því að læra sjálf að hnýta macramé og gera mitt eigið hengi,“ segir Ninna Stefánsdóttir en hún og eiginmaður hennar Pálmi Ketilsson, nýta hverja lausa stund til þess að hnýta blómahengi, vegghengi og hillubera.

Framleiðslan varð að lokum til þess að þau settu á fót merkið MARR.

„Hugmyndin hafði gerjast með okkur í talsverðan tíma og vefsíðan fór svo í loftið fyrir tveimur vikum. Macramé-heimurinn er mun stærri en ég hafði gert mér grein fyrir,“ segir Ninna.

„Ég lærði hnýtingarnar á YouTube og einnig er hægt að kaupa sér námskeið á netinu. Þarna fann ég handverk sem á mjög vel við mig en ég hef til dæmis aldrei verið mikið fyrir prjónaskap. Ég hef oftar farið út í byggingavöruverslun eftir við til að smíða eitthvað svo það kom fólkinu í kringum mig ekkert á óvart þegar ég byrjaði á þessu,“ segir Ninna.

Þetta er eitthvað!

„Þetta er ótrúlega skemmtilegt áhugamál sem varð að ástríðu. Ég byrjaði á blómahengjum sem smám saman þróuðust út í hillubera, af því að okkur vantaði hillu í eldhúsið. Eftir að ég hafði setið klukkutímum saman uppi á eldhúsbekk við að hnýta og koma hillunni saman hengdum við hana upp, virtum hana fyrir okkur á veggnum og hugsuðum bæði, „heyrðu, þetta er eitthvað!“

Við helltum okkur út í að þróa hilluna áfram og ég komst ekkert í að hnýta vegghengin sem ég hafði ætlað mér upphaflega að gera fyrr en miklu seinna. Hnýtingarnar eru frekar seinleg vinna,“ segir Ninna. Hún hafi því fljótlega virkjað eiginmanninn líka.

„Pálmi aðstoðar mig en við erum þrjá til fjóra tíma að hnýta í eina hillu. Hann er frábær á skærunum því það þarf mikið að klippa. Hann sér einnig um heimasíðuna.“

Fyrir utan macramé-hnýtingarnar stundar Ninna mastersnám í viðskiptafræði við Háskóla Íslands. MARR hefur hins vegar vaxið hraðar en hún átti von á svo fljótlega þurfti hún að minnka við sig námið.

„Við höfum fengið svo frábærar viðtökur og erum ótrúlega hamingjusöm með þetta. Það gefur manni kraftinn til þess að halda áfram. Planið er að fleiri komi inn í MARR með vorinu, meðal annars fáum við smið til liðs við okkur. Við sjáum fyrir okkur fleiri útgáfur af því sem við erum þegar að gera og að bæta við fleiri vörum. Það er svo ótrúlega margt sem mig langar til að gera. Hengið fyrir ofan rúmið okkar er ekki komið enn,“ segir hún hlæjandi.

„Ætli ég endi ekki bara á því að þurfa að kaupa mér það annars staðar.“

Nánar má forvitnast um macramévörurnar á marr.is