„Hræðilegt að liggja undir svona ásökunum í þennan tíma“

Konan sem rekinn var frá Subway í Vestmannaeyjum segir málið hafa verið hræðilegt fyrir hana og ömurlegt að liggja undir svona ásökunum í allan þennan tíma.

Konan var sýknuð í Héraðsdómi Suðurlands í gær af ásökunum um fjárdrátt á meðan hún starfaði á skyndibitastaðnum. Henni var sagt upp störfum í mars árið 2015 en þá hafði Stjarnan ehf., sem rekur Subway, kært málið til lögreglu.

„Það var hræðilegt að liggja undir svona ásökunum í þennan tíma,“ segir konan í samtali við Vísi sem vill ekki láta nafn síns getið.

Var frá vinnu í sex mánuði

Hún segist hafa verið frá vinnu í sex mánuði eftir að hún var rekin frá Subway, eða frá lokum mars mánaðar 2015 til september sama árs. „Ég hef ekki fundið fyrir neinu nema trausti frá núverandi vinnuveitendum sem þó vissu af þessu máli,“ segir konan.

Hún segist hafa fundið fyrir því að talað hafi verið um málið í Vestmannaeyjum frá því henni var sagt upp störfum fyrir tveimur árum.

Spurð hvers vegna hún telur Subway hafa farið svo hart fram í þessu máli segist hún ekki gera sér grein fyrir því.

„Þetta kom eins og blaut tuska framan í mig.“

Málið varðaði tæpar 15 þúsund krónur

Henni var gefið að sök að hafa gefið manni sínum 12 tommu bát, að andvirði tæplega 1.600 króna, án þess að greiða fyrir hann. Í ljós kom að konan hafði fengið þau fyrirmæli frá gæðastjóra Subway að gefa manninum bátinn í staðinn fyrir ýmis háttar viðvik á staðnum.

Þá var hún sökuð um að hafa dregið sér tæpar 13.000 krónur í peningakassa Subway en í ljós kom að það hafði hún ekki gert heldur þurfti hún að stimpla inn færslur og eyða þeim út aftur til að fá kassann til að virka.

Munu verjast skaðabótakröfunni

Konan hefur höfðað skaðabótamál á hendur Subway og fer fram á 2,3 milljónir króna frá rekstrarfélagi skyndibitakeðjunnar, Stjörnunni ehf. Skiptist upphæðin í tvennt, 1,3 milljónir vegna vangoldinna launa og ein milljón króna í skaðabætur.

Framkvæmdastjóri Subway sagði við Vísi fyrr í dag að fyrirtækið muni verjast þessari skaðabótakröfu konunnar.

Í dómsorði Héraðsdóms Suðurlands kemur fram að allur sakarkostnaður greiðist úr ríkissjóði, þar með talið málsvarslaun skipaðs verjanda konunnar upp á 908 þúsund krónur auka ferða- og aksturskostnaðar hans upp á tæpar sextíu þúsund krónur.