Fjarðabyggð þreytt á seinagangi Isavia

Bæjarráð Fjarðabyggðar hefur samþykkt að Fjarðabyggðarhöfn leggi til 25 milljónir króna til að leggja klæðningu á Norðfjarðarflugvöll sem rekinn er af Isavia. Hann sé illa farinn en á sama tíma mikilvægur fyrir sjúkraflug frá Austfjörðum.

Sævar Guðjónsson, formaður hafnarstjórnar, segir það skrýtið að þurfa að setja peninga bæjarins í þessa framkvæmd því Isavia rekur flugvöllinn en virðist ekki fara í nauðsynlegar framkvæmdir við hann. „Það er auðvitað kjánalegt að gera þetta svona og það á ekkert að vera þannig. Hins vegar er þessi flugvöllur þjóðhagslega mikilvægur, með stöndug sjávarútvegsfyrirtæki hér, álverið á Reyðarfirði og svo á stundum er allur íslenski fiskiskipaflotinn úti fyrir Austurlandi. Þá er mikilvægt að geta komið fólki fljótt og örugglega undir læknishendur í Reykjavík,“ segir Sævar.

Isavia rekur íslenska flugvelli samkvæmt samningi við innanríkisráðuneytið. Ekki hefur fengist nægjanlegt fé á fjárlögum til að leggja klæðningu á flugvöllinn. Vikulega er farið í sjúkraflug til Reykjavíkur frá Norðfjarðarflugvelli. 

Fréttin birtist fyrst í Fréttablaðinu 24. júní 2016