Tré í skógarlundi rakst í byggðalínu og olli skammhlaupi

Blöndulína 1, sem er hluti af byggðalínu Landsnets, sló út í rúmar þrjár klukkustundir síðastliðinn sunnudag vegna þess að tré í Þórdísarlundi, sem stendur undir línunni slóst í hana og við það varð skammhlaup.

„Sýnir glögglega þörfina á betri tengingu og sterkari byggðalínu," segir Steinunn Þorsteinsdóttir, upplýsingafulltrúi Landsnets.

Útleysing línunnar, sem liggur milli virkjunar í Blöndu og spennistöðvar við Laxárvatn í Húnavatnssýslu, olli því að byggðalínan var aftengd og því raforkukerfið allt rekið á tveimur eyjum. Norðurland og Austurland í einni eyju og Suðvesturland í annarri eyju.

„Miklar tíðnisveiflur urðu á Suðvesturlandi sem urðu til þess að Ísal, Norðurál og Elkem ásamt skerðanlegum notendum á Vestfjörðum leystu út hluta af sínu álagi. Engar tilkynningar um skemmdir á búnaði hafa borist í kjölfar truflunarinnar," segir Steinunn.

Þessi útleysing sýnir, að mati Steinunnar, hversu mikil þörf sé á að endurbyggja byggðalínuna og efla raforkuflutningskerfið um allt land. 

„Hún er allt of veik borið saman við þær einingar sem tengjast henni, þ.e. bæði álag og framleiðslu. Eðlilegt er að gera kröfu til þess að hringtengingar þoli truflun á einni einingu en byggðalínan þolir illa truflanir eins og staðan er í dag og ekki er hægt að tryggja nægjanlegt afhendingaröryggi,“ segir Steinunn.

Byggðalínan er þrjátíu ára gömul en undirbúningur að lagningu hennar hófst á fyrri hluta áttunda áragurins og lauk verkefninu 1984.