Fjórir óskyldir Dóminíkar í fangelsi vegna fíkniefnasmygls

Rúmlega þrítug kona frá Dóminíska lýðveldinu var handtekin á Keflavíkurflugvelli þann 15. maí síðastliðinn með um 350 grömm af kókaíni innvortis. Í dag er hún í gæsluvarðhaldi í fangelsinu á Akureyri.

Einnig eru tvær aðrar konur frá sama landi í fangelsi á Íslandi fyrir innflutning fíkniefna en allar þrjár eru hollenskir ríkisborgarar. Samkvæmt heimildum Fréttablaðsins þekkjast konurnar ekki, en komu allar frá Hollandi til Íslands hver í sínum mánuðinum á þessu ári.

Hinar tvær voru báðar sakfelldar í Héraðsdómi Norðurlands eystra síðastliðinn mánudag. Önnur þeirra er á sjötugsaldri og fékk fimmtán mánaða dóm fyrir innflutning á rúmum 600 grömmum af kókaíni. Hún kom til landsins 28. febrúar síðastliðinn. Hin konan er á fimmtugsaldri og var handtekin nokkrum dögum áður. Hún fékk tuttugu mánaða dóm fyrir innflutning á tæplega 750 grömmum af kókaíni. Þetta staðfesta lögmenn síðastnefndu tveggja kvennanna.

Þá er karlmaður, einnig frá Dóminíska lýðveldinu, í fangelsi á Litla-Hrauni fyrir innflutning á rúmum 700 grömmum af kókaíni. Hann var handtekinn 11. febrúar á Keflavíkurflugvelli. Þannig eru að minnsta kosti fjórir einstaklingar í fangelsi á Íslandi frá Dóminíska lýðveldinu fyrir innflutning á kókaíni.

Sveinbjörn Halldórsson, lögreglufulltrúi hjá rannsóknardeild lögreglunnar á Suðurnesjum, segir lögregluna ekki geta tjáð sig um málin að svo stöddu.

Á síðasta ári féllu tveir dómar í umfangsmiklum fíkniefnamálum. Mirjam Foekje van Twuijver var dæmd í ellefu ára fangelsi fyrir smygl á tæplega tuttugu kílóum af fíkniefnum til Íslands og Barry Van Tuijl var dæmdur í átta og hálfs árs fangelsi fyrir smygl á tæplega 210 þúsund MDMA-töflum og rúmlega 30 kílóum af amfetamíni. Bæði eru þau hollenskir ríkisborgarar og smygluðu efnunum frá Hollandi. Þá er eitt umfangsmikið fíkniefnamál til rannsóknar hjá lögreglu en fjórir menn eru í farbanni vegna málsins, tveir Íslendingar og tveir Hollendingar. Um er að ræða rúm tuttugu kíló af kókaíni sem komu hingað til lands með Norrænu í september síðastliðnum.