Óskað eftir vitnum að líkamsárás og ráni

Óskað er eftir vitnum að líkamsárás og ráni sem átti sér stað á Klapparstíg í Reykjavík um kl. 1.30 aðfaranótt sunnudagsins 14. ágúst. Þetta kemur fram á Facebook-síðu Lögreglunnar á höfuðborgarsvæðinu.

Ráðist var á karl á þrítugsaldri og hann laminn og rændur. Þolandinn var staddur neðarlega á Klapparstíg, á milli Hverfisgötu og Lindargötu, þegar á hann var ráðist, en tilkynning um málið barst lögreglu kl. 1.33 þessa sömu nótt.

Upplýsingum má koma á framfæri í tölvupósti á netfangið marino.ingi@lrh.is, í einkaskilaboðum á Facebook-síðu Lögreglunnar á höfuðborgarsvæðinu og í síma lögreglunnar 444 1000.