Sprengdi sjálfan sig í loft upp við svæði tónlistarhátíðar í Þýskalandi

Sýrlenskur flóttamaður sem nýverið hafði verið synjað um hæli sprengdi sjálfan sig í loft upp og særði tólf manns við svæði tónlistarhátíðar í Ansbach í suðurhluta Þýskalands í gærkvöldi.

Innanríkisráðherra Bæjaralands segir að hinn 27 ára árásarmaður hafi sprengt sprengjuna sem hann geymdi í bakpoka eftir að hafa verið neitað um inngöngu á hátíðarsvæðið.

Hátíðarsvæðið var rýmt eftir að sprengjan sprakk en um 2.500 manns voru þar inni.

Mikil spenna hefur verið í Bæjaralandi eftir að hryðjuverkasamtökin ISIS lýstu yfir ábyrgð á axarárás manns sem varð fimm manns að bana í lest fyrir viku. Á föstudaginn varð svo átján ára piltur níu manns að bana og særði á fjórða tug í skotárás í og í kringum verslunarmiðstöð í München.

Í frétt BBC segir að sprengjuárásin í Ansbach hafi orðið klukkan 22:10 að staðartíma fyrir utan skemmtistaðinn Eugens Weinstube í miðbæ Ansbach. Um 40 þúsund manns búa í bænum og er þar að finna bandaríska herstöð.