Um 300 hafa farist í flóðum í Kína

Allt að þrjú hundruð manns hafa farist í flóðum í norðurhluta Kína síðustu vikuna. Gríðarlegt úrhelli hefur verið á svæðinu, þar sem héruðin Henan og Hebei hafa orðið verst úti.

Rúmlega hálf milljón manna hafa neyðst til að flýja heimili sín samkvæmt upplýsingum frá innanríkisráðuneyti landsins.

Fimm embættismenn voru í dag reknir frá störfum og eru þeir sakaðir um að hafa ekki sinnt skyldu sinni þegar mikil flóð urðu í borginni Xingtai í síðustu viku þar sem 25 manns fórust.

Borgarbúar í Xingtai hafa sakað yfirvöld um að hafa brugðist tilkynningaskyldu og ekki varað þá við yfirvofandi flóðum, auk þess að hafa reynt að hylma yfir um orsakir dauðsfallanna.