Tveggja ára gæsaskytta fékk fjórar í fyrstu ferð

Þau Karen Andrea Heimisdóttir og Marvin Ómarsson tóku dóttur sína, hina tveggja ára Ylfu Mjöll, með sér á klukkutíma langt gæsaskytterí um helgina. Stúlkan sat róleg og lék með boltann sinn þegar gæsahópur flaug yfir og náðu foreldrarnir fjórum fuglum. „Veiðar eru frábært fjölskyldusport og henni fannst ótrúlega gaman,“ segir Karen.

Amman og afinn voru upptekin þennan dag og það viðraði vel til gæsaveiða. Stutt frá heimili þeirra, við Svarthamra sem eru skammt frá Neskaupstað, er lítið vatn þar sem gæsir koma reglulega. „Við ákváðum að rölta niður eftir með hana í bakpokanum og athuga hvort það kæmi flug. Við vorum í rúman klukkutíma. Við vildum líka aðeins sjá hvernig hún yrði því við vorum í veiðigallanum með byssurnar en hún kvartaði ekkert og fannst þetta mjög skemmtilegt.“

Marvin setti inn færslu á lokaðan hóp skotveiðifólks þar sem hann lýsti veiðiferðinni. „Stundum er veiðin bara góð fjölskyldustund. Fyrsta veiðiferð dóttur okkar og fannst henni mjög gaman. Vorum í klukkutíma og fórum heim með 4 gæsir, hefði ekki getað verið betra,“ skrifaði Marvin. 

Viðbrögðin hafa verið mjög jákvæð. „Það er oft mikið af myndum þarna inni frá fólki sem er að skjóta mikið af magni þannig að það var ágætt að setja þarna inn að þetta er líka krúttlegt fjölskyldusport. Kíkja í stutta stund með fjölskyldunni og veiða nokkrar gæsir. Ylfu finnst gaman að umgangast fugla og við vildum sýna henni að þetta er eðlilegt, og fyrir okkur er eðlilegt að veiða í matinn. Hún hafði mjög gaman af þessu og vissi að við ætluðum að reyna að veiða fuglana sem kæmu. Hún sat hjá okkur með boltann sinn og kippti sér lítið upp við það þegar við skutum enda með góðar heyrnarhlífar – og við öll. Hún er alveg þokkalega vön byssum því við þurfum stundum að skjóta á varg sem er hér í kringum okkur.“ 

Fréttin birtist fyrst í Fréttablaðinu.