Drekka kaffi, borða köku og ræða dauðann

„Á Dauðakaffi kemur fólk saman til þess að borða köku, drekka kaffi og ræða dauðann. Fólk sem oft þekkist ekkert,“ segir Lóa Björk Ólafsdóttir einn forsvarsmanna Dauðakaffis á Íslandi. „Tilgangurinn er að vekja fólk til meðvitundar um að allt líf tekur enda og skerpa sýn fólks á að lifa lífinu vel, í ljósi endanleika þess,“ segir Lóa. Dauðakaffi voru haldin þrisvar sinnum í vetur og fengu góðar undirtektir og mætingu.

Haldið verður áfram næsta haust en Lóa minnir á að hver sem er getur haldið Dauðakaffi. Til að mynda hafi aðilar á Akureyri og víðar á landsbyggðinni sýnt áhuga á að halda Dauðakaffi. „Allir eru velkomnir á Dauðakaffi og öllum er frjálst að standa fyrir slíkum viðburði. Það hafa komið að máli við okkur aðilar af landsbyggðinni, Akureyri til dæmis, sem hafa lýst yfir áhuga á að halda Dauðakaffi í sinni heimabyggð. Stofnuð var fésbókarsíðan „Dauðakaffi“ í þeim tilgangi að auglýsa viðburði, svara fyrirspurnum og gefa tækifæri til að deila hugleiðingum,“ segir Lóa frá.

„Upphafsmaðurinn var félagsráðgjafinn Bernard Crettaz. En það var svo Jon Underwoods sem stofnaði síðuna deathcafe.com, þar sem finna má leiðbeiningar um hvernig skal standa að svona stundum. Jon Underwood hefur stofnað sérstakt kaffihús, Death Café, í London sem er helgað umræðum um dauðann. Við höfðum samband við Jon sem veitti okkur ráðgjöf og upplýsingar,“ segir hún.

Lóa starfar sem hjúkrunarfræðingur og segir þörf á opnari umræðu um dauðann í samfélaginu. „Það er oft ákveðið tabú að ræða dauðann, til dæmis í tengslum við veikindi, sem kemur sér ekki alltaf vel. Sú nálgun sem Dauðakaffið býður upp á þykir mér því góð leið til að brjóta upp bannhelgina sem gjarnan hvílir yfir dauðanum sem umræðuefni. Á kaffistundunum er lögð áhersla á virðingu í samskiptum og fyrir skoðunum, trú, gildum og viðhorfum annarra.

Í Dauðakaffi er enginn leiddur að sérstakri niðurstöðu, þá er þetta ekki vettvangur fyrir ráðgjöf eða stuðning við syrgjendur þótt margir hafi hag af því að geta rætt sína reynslu. Ef einhver hefur áhuga á að standa fyrir kaffistundum sem þessum er velkomið að hafa samband við okkur sem nú höfum reynsluna, en við höfum líka tekið saman og þýtt leiðbeiningar og efni frá deathcafe.com.

Fréttin birtist fyrst í Fréttablaðinu 2. maí.