Flokkur Rajoy hlaut flest atkvæði en áframhaldandi stjórnarkreppa

Íhaldsflokkur Mariano Rajoy, starfandi forsætisráðherra Spánar, vann sér inn flest þingsæti í spænsku þingkosningunum sem fram fóru í gær. Flokkurinn náði þó ekki meirihluta og eru því líkur á áframhaldandi stjórnarkreppu í landinu.

Flokkur Rajoy, PP, vann sér inn 137 þingsæti í kosningunum, en alls eiga 350 þingmenn sæti á spænska þinginu. Þingmönnum flokksins fjölgaði þar með um fimmtán, borið saman við þá 122 sem þeir unnu sér inn í kosningunum í desember.

Sósíalistaflokkurinn PSOE hlaut næstflest þingsæti, eða 85, vinstri flokkurinn Unidos Podemos 71 og mið-hægri flokkurinn Ciudadanos 32 þingsæti.

Stjórnarkreppa hefur ríkt í landinu síðastliðna sex mánuði eða allt frá þingkosningunum í desember.

Í frétt BBC er haft eftir Rajoy að hann telji sig hafa rétt til að starfa áfram sem forsætisráðherra. Hann segist vonast til að flokkarnir á þingi geti náð samkomulagi um stjórnarmyndun innan mánaðar.

Rajoy stendur þó frammi fyrir sama vandamáli og eftir kosningarnar í desember, það er að tryggja myndun starfhæfs meirihluta á þinginu.