Fyrsta stiklan úr John Wick 2

Fyrsta stiklan fyrir framhald kvikmyndarinnar John Wick leit dagsins ljós í dag.

Stiklan var frumsýnd í dag og má þar sjá Keanu Reeves, aðalleikara myndarinnar í miklum ham. Myndin, sem ber hið frumlega nafn John Wick: Chapter 2, er framhald myndarinnar John Wick sem kom út árið 2014. Þar leikur Keanu mann sem var áður leigumorðingi og vill rússneska mafían hafa hendur í hári hans.

Í stiklunni, sem sjá má hér að neðan, virðist John Wick eiga í heljarinnar útistöðum við einhverja ribbalda í Róm og honum við hlið er ný hjálparhella, hundur. Vonum að hundurinn hljóti ekki sömu örlög og forveri hans í fyrri myndinni en meðferðin á honum varð til þess að leigumorðinginn ákvað að drepa svo gott sem allt sem á vegi hans varð.

Gert er ráð fyrir því að John Wick: Chapter 2 verði frumsýnd í febrúar á næsta ári. Meðal annarra leikara eru Ruby Rose, Laurence Fishburne, Common, Ian McShane og Bridget Moynahan. Stiklan er hér að neðan.