Beauty Bar hyggst leita réttar síns vegna fréttar Pressunnar

Beauty Bar snyrtivöruverslun í Kringlunni hyggst leita réttar síns vegna fréttar sem birtist á Pressunni síðastliðinn þriðjudag.

Fréttin hafði yfirskriftina „Snyrtivöruheimurinn á Íslandi skelfur vegna hótana og áreitis samkeppnisaðila: „Við erum hræddar.“ Þar rekja nafnlausir viðmælendur Pressunnar, sem eru eigendur snyrtivöruverslana, sögur af áreiti og hótunum í garð þeirra frá eigendum annarrar snyrtivöruverslunar. Í frétt Pressunnar segir að viðmælendurnir hafi kosið að koma fram nafnlaust „af ótta við sömu tvo einstaklingana sem opnuðu verslun í samkeppni við þau og bjóða upp á margar af þeirra vörum í dag.“

Í frétt Pressunnar kemur hvergi beint fram að um verslunina Beauty Bar sé að ræða, en telja eigendur hennar að í henni sé vegið mjög að fyrirtækinu. Þar sé meðal annars fullyrt að forsvarsmenn félagsins standi að baki hótunum í garð samkeppnisaðila, hafi beitt óeðlilegum viðskiptaháttum til að tryggja sér umboð fyrir tilteknum snyrtivörum og að framangreind atriði séu tengd íkveikju í Hafnarfirði.

„Skemmst er frá því að segja að „fréttin“ – sem skrifuð er af ónafngreindum fréttamanni og byggir á „viðtölum“ við ónafngreinda heimildamenn – er í öllum meginatriðum ósönn og merkja má á henni að engin gögn liggi að baki þeim staðhæfingum sem þar eru settar fram. Beauty Bar Snyrtivöruverslun hafnar alfarið þeim ásökunum sem á það eru bornar í „fréttinni,” segir í yfirlýsingu frá Beauty Bar.

Beauty Bar mun krefjast þess að Pressan dragi fréttina til baka, biðjist afsökunar á henni og greiði fyrirtækinu skaðabætur. 

„Fallist Pressan ekki á þau málalok mun Beauty Bar Snyrtivöruverslun láta reyna á málið fyrir dómstólum. Með sama hætti mun Beauty Bar Snyrtivöruverslun leita réttar síns gagnvart þeim einstaklingum, sem borið hafa „fréttina“ og önnur meiðyrði út á samfélagsmiðlum. Þá er réttarstaða stjórnenda einstakra hópa á Facebook – þar sem meiðandi ummæli hafa verið látin standa óáreitt, til sérstakrar skoðunar hjá lögmönnum Beauty Bar Snyrtivöruverslunar. Sú skoðun kann að leiða til þess að viðkomandi einstaklingar verði látnir sæta ábyrgð aðgerðarleysis síns fyrir dómi.”

Yfirlýsing frá Beauty Bar

Þann 21. nóvember sl. birti vefmiðillinn Pressan „frétt“ undir yfirskriftinni „Snyrtivöruheimurinn á Íslandi skelfur vegna hótana og áreitis samkeppnisaðila: Við erum hræddar“. Í greininni er með rakalausum hætti vegið mjög að fyrirtækinu Beauty Bar Snyrtivöruverslun í Kringlunni og fullyrt að forsvarsmenn félagsins standi að baki hótunum í garð samkeppnisaðila, hafi beitt óeðlilegum viðskiptaháttum til þess að tryggja sér umboð fyrir tilteknum snyrtivörum og framangreind atriði svo tengd máli er snýr að eignarspjöllum í Hafnarfirði og líkamsárás á tilgreindan aðila.

Skemmst er frá því að segja að „fréttin“ – sem skrifuð er af ónafngreindum fréttamanni og byggir á „viðtölum“ við ónafngreinda heimildamenn – er í öllum meginatriðum ósönn og merkja má á henni að engin gögn liggi að baki þeim staðhæfingum sem þar eru settar fram. Beauty Bar Snyrtivöruverslun hafnar alfarið þeim ásökunum sem á það eru bornar í „fréttinni“. 

Í ljósi þess að umrædd „frétt“ hefur þegar valdið fyrirtækinu ómældu tjóni mun Beauty Bar Snyrtivöruverslun nú krefjast þess að Pressan dragi fréttina til baka, biðjist afsökunar á henni og greiði fyrirtækinu skaðabætur. Fallist Pressan ekki á þau málalok mun Beauty Bar Snyrtivöruverslun láta reyna á málið fyrir dómstólum. Með sama hætti mun Beauty Bar Snyrtivöruverslun leita réttar síns gagnvart þeim einstaklingum, sem borið hafa „fréttina“ og önnur meiðyrði út á samfélagsmiðlum. Þá er réttarstaða stjórnenda einstakra hópa á Facebook – þar sem meiðandi ummæli hafa verið látin standa óáreitt, til sérstakrar skoðunar hjá lögmönnum Beauty Bar Snyrtivöruverslunar. Sú skoðun kann að leiða til þess að viðkomandi einstaklingar verði látnir sæta ábyrgð aðgerðarleysis síns fyrir dómi.

Beauty Bar Snyrtivöruverslun er ungt fyrirtæki sem hefur kappkostað að bæta vöruúrval, lækka verð og veita góða persónulega þjónustu á íslenska snyrtivörumarkaðnum neytendum til heilla. Sú aðför sem gerð hefur verið að fyrirtækinu er þeim sem að henni standa ekki til sóma, auk þess sem ljóst er að neytendur kunna að bera tjón af því ef samkeppni á þessum markaði minnkar. Það er von aðstandenda Beauty Bar Snyrtivöruverslunar að félagið geti haldið áfram að lækka verð og bæta kjör neytenda á Íslandi.