Matvörurnar bornar heim í Nirvana bol

„Þetta verkefni fæddist nú bara í kaffistofum og í spjalli. Ástæðan fyrir því að flestir nota ekki taupoka er að fólk gleymir honum annaðhvort heima hjá sér eða úti í bíl. Þá kom þessi hugmynd að hafa körfu í búðinni og bolapokarnir yrðu geymdir þar,“ segir Guðrún Ásdís Sturlaugsdóttir, verkefnastjóri Nýheima á Höfn í Hornafirði.

Guðrún setti verkefnið af stað sem gengur út á að losa Hornafjörð undan notkun plastpoka og fékk sveitarfélagið með sér í lið. Matvörubúðin á Höfn, Nettó, tók einnig vel í hugmyndina og við innganginn á búðinni stendur karfa með saumuðum pokabolum. „Við gerðum áætlun um að við þyrftum um 5.000 pokaboli til að það sé alltaf nóg í körfunni við innganginn. Við settum hópavinnu af stað og hittumst reglulega og saumum poka úr gömlum bolum og efnum sem fólk hefur gefið okkur. Það hafa komið alls konar skemmtileg gardínuefni, gamlir nærbolir og flott efni. Við klippum ermarnar og hálsmálið og þetta er allt þvegið vel og vandlega þannig matvælin eru sett í hreina og fallega poka.“

Saumakonurnar hittast í saumastofu sem sveitarfélagið lánar þeim einu sinni í mánuði. Fólkið hefur tekið verkefninu vel og má sjá unga sem aldna ganga út úr Nettó með vörur í Nirvana-, Iron Maiden-, Decode- eða Simpson-bolum með bros á vör. „Verkefnið gengur vel þó það séu ekki allir meðvitaðir um að það sé komið í gang. Fólk þarf að átta sig á því að þetta er verkefnið okkar en ekki bara mitt. Fólk heldur stundum að ég eigi að sauma alla pokana en ég get það ekki þó að ég væri gjarnan til í það. Þetta hefur gengið vel og það eru yfirleitt alltaf pokar í körfunni.

Bókasafnið hér í Hornafirði er byrjað á þessu og ég held að það sé alveg hætt að útdeila plastpokum,“ segir hún en ein kona frá Búðardal sem heimsótti Höfn í sumar byrjaði á svipuðu verkefni. Guðrún segir að það sé mikil stemning fyrir átakinu í bænum. „Þetta er töff. Það er miklu skemmtilegra að fara heim með vörurnar í flottum taupoka en í plastpoka. Ungt fólk hér hefur tekið þessu vel og það var ein ung stelpa sem kallaði á eftir mér að þetta verkefni væri geggjað. Þá varð ég stolt,“ segir hún en markmiðið er að dreifa verkefninu um allt Suðurland og svo um landið allt.

Fréttin birtist fyrst í Fréttablaðinu