Yfirburðastaða Guðna vekur athygli

„Það eru þó nokkrar breytingar frá síðustu könnun Félagsvísindastofnunar. En yfirburðarstaða Guðna vekur athygli,“ segir Baldur Þórhallsson prófessor í stjórnmálafræði við Háskóla Íslands.

Guðni Th. Jóhannesson missir tólf prósentustig í nýrri skoðanakönnun Félagsvísindastofnun Háskóla Íslands sem unnin var fyrir Morgunblaðið. Hástökkvarinn að þessu sinni er Halla Tómasdóttir. Þetta er á meðal niðurstaðna í skoðanakönnun Félagsvísindastofnun Háskóla Íslands sem gerð var 1. og 2. júní.

Guðni er þó enn með örugga forystu og mælist með tæplega 55 prósent fylgi en var með rúm 67 prósent í síðustu könnun stofnunarinnar sem var unnin fyrir Morgunblaðið.

Á eftir honum kemur Davíð Oddsson sem bætir við sig tæpum tveimur prósentum og mælist með 19,7 prósent. Andri Snær bætir einnig við sig og mælist með 12,3 prósent en var með 7,8 prósent áður.

Sá frambjóðandi sem mest bætir við sig að þessu sinni er Halla Tómasdóttir en hún fer upp um átta prósentustig úr 1,5 prósenti í 9,5 prósent.

Sturla Jónsson mælist með 1,6 prósent, Ástþór Magnússon með eitt prósent og aðrir frambjóðendur samanlagt með 1,1 prósent.

Baldur segir könnunina vera áhugaverða fyrir margar sakir ekki sýst vegna þess að Guðni Th mælist enn með yfirburðarfylgi þrátt fyrir að spjótum hafi verið beint að honum í almennum umræðum.

„Einnig vekur athygli að sá frambjóðandi sem kemur næst honum í fylgi, Davíð Oddsson, skuli ekki hafa bætt meira við sig af því að hann hefur verið nokkuð áberandi síðustu daga og vikur og sótt nokkuð að Guðna í fjölmiðlum,“ segir hann.

Þá virðist vera sem svo að það fylgi sem fari af Guðna sé að lenda hjá Höllu.

„Við höfum nú séð svipaða þróun í forsetakosningum hér áður þegar frambjóðendur, hvort sem það var Ólafur Ragnar Grímsson árið 1996 eða Þóra Arnórsdóttir núna síðast, mælast með mikið fylgi skömmu eftir að þeir tilkynna framboð. Það er nokkurnveginn óraunhæft að svo mikið fylgi haldist, allt að 70 prósent, líkt Ólafur mældist með árið 1996. Og þegar frambjóðendur sem næstir koma fara að kynna sig og fá meiri fjölmiðlaathygli að þeir bæti við sig. Þessvegna hefði maður talið það eðlilegt að Halla, Andri Snær og Davíð bæti við sig,“ segir Baldur.

Uppfært klukkan 14:19

Þess ber að geta að Félagsvísindastofnun vann einnig könnun fyrir stuðningsmenn Guðna Th. Jóhannessonar. Hún var tekin dagana 23. maí til 25. maí á milli þeirra kannana sem unnar voru fyrir Morgunblaðið.



Í þeirri könnun var Guðni Th. með 56,8 prósent. Þar á eftir kemur Davíð Oddsson með 22 prósenta fylgi. Andri Snær Magnason mældist með 12,3 prósent stuðning og Halla Tómasdóttir með 4,8. Aðrir frambjóðendur eru undir 2 prósentum.

Create bar charts