Setja aftur upp fyrstu sýningu skólans

Leikritið er byggt lauslega á samnefndri kvikmynd frá árinu 1984, eftir John Hughes. Það fjallar um hóp unglinga sem þekkjast lítið sem ekkert en neyðast til að verja heilum laugardegi saman á bókasafni, undir eftirliti kennara sem hefur innleitt eftirsetu að hætti bandarískra menntaskóla, í Verzlunarskóla Íslands,“ segir Dominique Gyða Sigrúnardóttir, leikstjóri sýningarinnar The Breakfast Club, sem Verzlunarskóli Íslands mun frumsýna 4. nóvember næstkomandi í bláa sal Verzlunarskólans.

Um er að ræða afmælissýningu skólans, en mikil tilviljun er að sama sýning var sett upp í Verzlunarskólanum fyrir 30 árum, árið sem hið nýja húsnæði skólans var tekið í notkun. „Þetta er algjör tilviljun. Verkið var svo sett upp aftur 1996, þá var það Jakob Ingimundarson sem leikstýrði og Jóhannes Ásbjörnsson, betur þekktur sem Jói í „Simmi og Jói“, fór með eitt af aðalhlutverkunum í verkinu,“ segir Dominique.

Óhætt að segja að nóg sé um að vera í uppsetningarferli verksins í dag, þar sem tæpar tvær vikur eru þar til hópurinn frumsýnir leikritið. „Við erum byrjuð að renna, hljóð og ljós eru að detta inn. Það er spennandi staður að vera á í svona ferli þegar verkið fer að taka á sig mynd,“ segir hún.

Leikritið er byggt lauslega á kvikmyndinni, en töluverðar breytingar hafa orðið á þýðingu handritsins. „Ég hafði oft séð myndina en það var margt sem rann ekki upp fyrir mér fyrr en ég fór að þýða verkið og skrifa leikgerðina. Það kom mér á óvart að það er töluvert um ofbeldi í kvikmyndahandritinu. Kennarinn hótar að berja nemanda fyrir að hafa gert grín að honum og einn af nemendunum spyr annan mjög persónulegra og kynferðislegra spurninga sem myndi flokkast sem kynferðisleg áreitni í dag,“ segir Dominique, og bætir við að hópurinn hafi rætt þetta vel og verið mjög gagnrýninn á handritið.

Fjöldi fólks kemur að sýningunni í ár, aðstoðarleikstjóri er Máni Huginsson, nemandi á öðru ári, og tónlistarmaðurinn Daði Freyr Pétursson, betur þekktur sem Mixophrygian, sér um tónlistina.„Við höfum mikla trú á að tónlistin muni koma áhorfendum skemmtilega á óvart,“ segir Dominique.

Með aðalhlutverk í sýningunni fara þau Tómas Arnar Þorláksson, Höskuldur Þór Jónsson, Karítas Bjarkardóttir, Mikael Emil Kaaber, Selma Kristín Gísladóttir, Viktor Pétur Finnsson og Þórdís Jakobsdóttir en þau þykja öll efnilegir leikarar.

„Krakkarnir hafa unnið hörðum höndum við að gera karakterana að sínum án þess að glata megineinkennum upprunalegu fyrirmyndanna. Þau hafa vikulega gefið út svokölluð karaktermyndbönd á heimasíðu leikritsins á Facebook, leiksýning Verzlunarskóla Íslands 2016. Myndböndin hafa fengið frábær viðbrögð og skapað smá eftirvæntingu,“ segir Dominique.