Spilagleðin sameinar ólíkar tónlistarstefnur

„Það meikar alveg sens og er mjög spennandi verkefni. Það er svo mikil spilagleði í reggí-tónlist sem að sjálfsögðu allir í sinfóníuhljómsveitinni eru með og það hlýtur að skila sér vel út í tónlistina og þaðan til áhorfenda,“ segir Salka Sól Eyfeld aðspurð hvort það virki að blanda saman sinfóníuhljómsveit og reggí-grúppu, en hún og hinir krakkarnir í hljómsveitinni Amabadama munu spila á tvennum tónleikum með SinfóníaNord – þeir fyrri fara fram í Hofi á Akureyri þann 4. febrúar og þeir seinni verða á dagskrá í Hörpu þann 24. sama mánaðar.

En hvernig kom þetta verkefni upp á borð hjá ykkur?

„Þorvaldur Bjarni sem sér um Sinfóníuhljómsveitina hringdi í mig í nóvember og spurði mig hvort þetta væri eitthvað sem við hefðum áhuga á því að hjá þeim væri mikill áhugi fyrir þessu. Ég eiginlega trúði ekki mínum eigin eyrum því mér finnst þetta bæði ótrúlegt tækifæri og eitthvað sem er ótrúlega spennandi að takast á við. Það er sérstaklega gaman hvað við erum ung hljómsveit og að við fáum strax svona stórt verkefni, það er mjög mikill heiður. Nöfnin okkar eru ekki enn komin upp á vegg á Hard Rock svo ég viti, en það er þá kannski bara næsta skref á ferlinum,“ segir Salka og hlær.

Eruð þið byrjuð að æfa?

„Við erum byrjuð að útsetja lögin af plötunni okkar Heyrðu mig nú og síðan förum við saman bráðlega að setja öll nýju lögin okkar í búning með sinfóníuhljómsveitinni. Mjög stífar æfingar byrja síðan í janúar, þannig að þá verðum við öll mjög mikið fyrir norðan að æfa.“

Þið ætlið ekkert að negla nokkrum sinfóníum í reggí-útgáfur?

„Jú?… við ætlum að setja níundu sinfóníu Beethovens í smá döbbútgáfu. Nei, nei, en það er samt kannski bara næsta verkefni hjá sinfóníuhljómsveitinni, sérstaklega ef þetta verður vel heppnað og vinsælt. Mögulega förum við þá bara að semja sinfóníur.“

Hvað er svo á döfinni hjá ykkur krökkunum?

„Magnús Geir útvarpsstjóri ætlar að leikstýra einu verki uppi í Borgarleikhúsi því að hann saknar þess svo mikið að leikstýra eftir að hann varð útvarpsstjóri. Hann bað okkur að semja tónlistina í þennan nýja farsa sem verður svo frumsýndur í mars. Svo erum við auðvitað að taka upp nýja plötu og við förum á fullt í það eftir Sinfó,“ segir Salka að lokum, en það virðist vera alveg meira en nóg að gerast hjá þeim á næsta ári.