Nýr rammi er ekki töfralausn

Nýr rammi peningastefnunnar eftir losun fjármagnshafta hefði áfram stöðugt verðlag að meginmarkmiði og það yrði útfært með formlegu og tölusettu verðbólgumarkmiði eins og nú er.

Þetta kom fram í máli Más Guðmundssonar seðlabankastjóra á aðalfundi Samtaka atvinnulífsins (SA) í gær.

Yfirskrift fundarins var „Fíllinn í herberginu“ og þar vísað til efnahagslegs óstöðugleika sem sögulega hefur stafað af krónunni.

Í ræðu sinni fór Már yfir brotalamir við stjórn peningamála fyrir hrun og sögu gjaldmiðilsins. Með flotgengisstefnu sem tekin var upp 2001 hafi átt að forðast inngrip á fjármálamarkaði, fjármálaeftirlit átti að sjá til þess að einstakar fjármálastofnanir væru í lagi og ríkisfjármálin hlutlaus yfir hagsveifluna. Markaðir myndu svo sjá um afganginn. „Það reyndist ekki svo,“ sagði Már.

Nýr rammi segir hann að feli í sér „stýrt flot“ krónunnar, sem án tiltekins gengismarkmiðs hefði það að markmiði að dragar úr óhóflegum sveiflum á gengi gjaldmiðilsins vegna tímabundins fjármagnsinnstreymis og draga úr skammtímaflökti á gengi.

Már áréttaði að lokum að nýr rammi yrði betri en sá sem við höfðum fyrir fjármálakreppu.

„En hann verður engin töfralausn.“ Peningastefnan verði áfram framkvæmd við skilyrði óvissu í síbreytilegum heimi. „Hún á þó við flestar aðstæður að geta til lengri tíma litið skilað okkur verðstöðugleika og það er ekki svo lítið.“

Þessi grein birtist fyrst í Fréttablaðinu þann 8. apríl.