Gylfi hugsar daglega um EM

Gylfi Þór Sigurðsson, leikmaður Swansea í ensku úrvalsdeildinni, var kurteisin uppmáluð að vanda þegar hann fór í hvert viðtalið á fætur öðru á æfingu karlalandsliðsins í fótbolta á Laugardalsvelli í gærmorgun. Gylfi var í meðhöndlun sjúkraþjálfara þegar annar tími gafst til að hitta strákana fyrr í vikunni og sátu því íslenskir og erlendir fjölmiðlar um Gylfa Þór eins og gammar í gær.

Gylfi er einn níu leikmanna liðsins sem mættu til æfinga á mánudaginn en þessa vikuna hafa strákarnir úr stóru deildunum sem búnar eru verið að æfa. Ari Freyr Skúlason bætist reyndar í hópinn á morgun en hann lenti í fyrradag og fylgdist með æfingu strákanna.

Spilaði meiddur



„Standið á mér er mjög fínt og standið á hópnum mjög gott fyrir utan Aron og Kolbein. Við erum búnir að sjá nokkuð miklar framfarir á þeim. Þeir eru báðir búnir að vera með á æfingum þessa vikuna. Aron Einar er nokkrum dögum frá því að vera 100 prósent með okkur og Kolbeinn er á leiðinni,“ segir Gylfi en hann spilaði ekki síðustu tvo leiki Swansea í ensku úrvalsdeildinni. Hann hefur verið meiddur í öxl undanfarnar vikur.

„Ég gat alltaf spilað. Þetta var meira í bakinu eða herðablaðinu. Ég spilaði í gegnum þetta í 3-4 vikur þar sem þetta er ekki alvarlegt. Hugmyndin hjá Swansea var sú að við sem erum að fara á EM fáum ekki mikið frí eftir mótið. Því vildi félagið gefa okkur nokkurra vikna frí fyrir keppnina sem er frábært. Ég finn það alveg að ég er mun frískari núna en í lok tímabilsins.“

Þrjóskan kom Gylfa í gang

Gylfi Þór átti erfitt uppdráttar eins og Swansea-liðið á fyrri hluta tímabils en eftir jól fór allt í gang. Gylfi skoraði níu mörk á seinni hluta tímabilsins en nær öll þeirra tryggðu Swansea mikilvæg stig í fallbaráttunni. Það er svo sannarlega ekki orðum aukið að segja að Gylfi sé langstærsta ástæða þess að Swansea spilar áfram í úrvalsdeildinni. En hver er ástæðan fyrir þessum frábæra seinni hluta mótsins?

„Bara þrjóska, held ég. Okkur gekk ekkert of vel fyrir jól en þar vorum við í smá vandræðum. En þegar fyrsta markið dettur inn þá kemur sjálfstraustið og hlutirnir fara að ganga. Ég breytti engu þótt liðið fengi nýjan þjálfara. Fyrir utan það vorum við að gera sömu hlutina aftur og aftur og við höfðum trú á þeim. Svo loks fór þetta að ganga,“ segir Gylfi Þór.

Á meðan hann var að bjarga Swansea frá falli og vera einn besti miðjumaður ensku úrvalsdeildarinnar var EM alltaf í huga hans.

„Auðvitað er erfitt að loka á EM. Maður hugsar um mótið daglega og vill alls ekki meiðast. En við vorum í þannig stöðu hjá Swansea að við þurftum að einbeita okkur að deildinni þar sem við vorum ekki langt frá falli á tímabili. En við náðum að rétta úr kútnum og enda um miðja deild sem var frábært,“ segir Gylfi.

Næsta spurning



Þegar menn spila jafn vel og Gylfi Þór í ensku úrvalsdeildinni og fyrir eitt af minni liðunum eins og Swansea er fastur liður hjá enskum blöðum að skrifa þá til annarra og stærri liða. Það hefur svo sannarlega átt við um Hafnfirðinginn sem hefur verið orðaður við Fiorentina, Dortmund og Englandsmeistara Leicester. Er eitthvað komið í gangi í þessum málum?

„Algjörlega ekki. Ég einbeiti mér að fullu núna með landsliðinu. Mér gekk vel eftir áramót hjá Swansea og á tvö ár eftir af samningnum þar. Ég er ánægður hjá Swansea og er ekkert að hlaupa í burtu þaðan. Ég vona að næsta spurning sé um landsliðið því ég einbeiti mér núna bara að Frakklandi og því sem við ætlum að gera þar,“ segir Gylfi sem hafði takmarkaðan áhuga á að ræða framtíð sína með félagsliðinu en þeim mun meiri áhuga á að tala um Ísland.

Meistaradeildin er samt eitthvað sem heillar hann að sjálfsögðu. „Það skiptir ekki máli hvort þú spyrð 19 ára gamlan strák eða 35 ára gamlan mann hvort hann vilji spila í Meistaradeildinni. Svarið er alltaf já.“

Bestir sem lið



Gylfi Þór segir að strákarnir séu aðeins byrjaðir að skoða mótherjana á Evrópumótinu en íslenska liðið er í riðli með Portúgal, Ungverjalandi og Austurríki. Mestu skiptir þó fyrir strákana, að sögn Gylfa, að hugsa um þeirra leik.

„Við höfum aðeins skoðað mótherjana en það mikilvægasta fyrir okkur erum við sjálfir. Við þurfum að spila okkar leik eins og við höfum gert síðustu fjögur ár. Við megum alls ekki halda að við séum orðnir of góðir og fara að spila sem einstaklingar því þegar við spilum sem lið erum við mjög góðir,“ segir Gylfi.

Á æfingunum tveimur í Laugardalnum þessa vikuna var nóg af erlendum fjölmiðlamönnum en áhuginn á íslenska liðinu er mikill. Svona mikilli umfjöllun eru ekki allir strákarnir í liðinu vanir en hún verður enn meiri í Frakklandi.

„Fjölmiðlafulltrúinn sér um að loka á þetta fyrir okkur. Við þurfum bara að vera rólegir og einbeita okkur að æfingunum og leikjunum og reyna að loka á allt annað. Það er mikilvægt að gera ekki of mikið en auðvitað eru viðtöl sem við þurfum að fara í. Auðvitað er gott að gefa af sér út á við en aðalatriðið er að einbeita okkur að fótboltanum og reyna að spila vel,“ segir Gylfi Þór Sigurðsson.