Foreldrar í Laugardalnum safna undirskriftum fyrir gönguljós

„Ég lenti í því sjálf fyrir nokkrum árum að það munaði hársbreidd að það væri keyrt á mig og tvö börn þegar ég var að ganga yfir Reykjaveginn,“ segir Vanda Sigurgeirsdóttir, ein foreldranna sem safna undirskriftum fyrir að fá gönguljós við götuna.

Í að minnsta kosti 25 ár hefur verið umræða um þörfina á gönguljósum við Reykjaveginn, götuna sem er á milli annars vegar Laugardalsins, laugarinnar og World Class og hins vegar Laugarnesskóla. Mikill fjöldi barna fer yfir götuna á degi hverjum en síðustu ár hefur umferðin aukist mikið vegna fólks á leið í líkamsrækt, ferðamanna á hótelum og gistiheimilum í hverfinu og þéttingu byggðar.

„Bílstjórinn sem keyrði næstum á mig var í símanum og ég gekk 200 metra spöl hér í gær og á leiðinni sá ég átta í símanum. Hættan sem skapast vegna þess, aukin umferð og aukinn hraði valda því að gatan er slysagildra og það þarf að gera eitthvað í því áður en það verður alvarlegt slys. Það er bara tímaspursmál,“ segir Vanda, sem ásamt tveimur öðrum mæðrum í hverfinu gengur í hús þessa dagana.

Hverfisbúar geta einnig skrifað sig á listana sem eru hjá fisksalanum í hverfinu. Viðbrögðin hafa ekki látið á sér standa. „Það hafa margir hugsað um þetta lengi en nú er orðin knýjandi nauðsyn.“

Hverfisbúar munu afhenda borgarstjóra listana á næstu dögum.

Fréttin birtist fyrst í Fréttablaðinu 22. júní 2016