Los Angeles Times fjallar um Borgarstjórann

Dagblaðið Los Angeles Times fjallaði á dögunum um Borgarstjórann væntanleg sjónvarpsseríu Jóns Gnarr. Blaðamaður dagblaðsins heimsótti Ísland og fékk að vera viðstaddur tökur á þættinum sem frumsýndur verður á Stöð 2 í haust.

Það vekur greinilega heims athygli að gamanleikari sem tók pásu á sínum tíma til þess að verða borgarstjóri sé nú kominn aftur í grínið til þess að leika borgarstjórann. Þættinum er líkt við bandaríska gamanþáttinn Veep nema bara með raunverulegum stjórnmálamanni í aðalhlutverki.

Stjórnmálamenn muna ekki loforð sín

Í viðtalinu segir Jón fyrst tvö ár hans sem borgarstjóra hafa verið honum afar erfið.

„Ég fékk í magann á hverjum degi vegna stress og árásargirni andstæðinga minna,“ segir Jón um borgarstjóratíð sína. Jón leikur ekki sjálfan sig í þáttunum heldur drykkfellda borgarstjórann Lúðvík sem man oftast ekki hverju hann lofaði eða hverjum vegna áfengisvanda síns.

„Vandamál stjórnmálamanna er ekkert ósvipað. Þeir tala við svo marga, og gefa svo mörg loforð að þeir geta ómögulega munað hvað þeir sögðu við hvern.“

Ekki bara einn stjórnmálamaður að halda framhjá

Eiginkona Jóns, Jóhanna „Jóga“ Jóhannsdóttir, er samstarfsmaður Jóns við gerð Borgarstjórans og spyr blaðamaður hana hvort þættirnir eigi hugsanlega eftir að reita einhverja íslenska stjórnmálamenn til reiði þar sem þeir telji að persónur þáttanna eigi að vera skopmynd af þeim.

„Ég held að margir eigi eftir að gera það,“ svarar Jóhanna. „Einhverjir verða að velta því fyrir sér hvort sögupersónan sem séu að svindla eigi að vera þeir. Til allrar lukku munu þeir ekki hafa neina hugmynd um það. Það er ekki bara einhver ein manneskja í íslenskum stjórnmálum að svindla.“

Hægt er að lesa alla umfjöllun Los Angeles Times um Borgarstjórann hér.