Háskóli Íslands týndi BS-ritgerð nemanda

Ásrún Ísleifsdóttir lenti í þeirri miður skemmtilegu reynslu að Viðskiptafræðideild Háskóla Íslands týndi BS-ritgerðinni hennar.

„Ég skilaði henni inn fyrir mánuði síðan og hún fjallaði um ímynd Mac-Cosmetics. Þegar í ljós kom að hún fyndist ekki var ég beðin um að senda kvittun sem ég fékk aldrei. Ég gat sent þeim skjáskot af því að ég hefði borgað fyrir prentunina í Háskólaprenti og skjáskot af því að innri vefur þeirra Skemman hefði móttekið hana á sínum tíma.“

Þar með náði Ásrún að sanna mál sitt og mun ekki lenda í neinum vandræðum þrátt fyrir að útprentaða eintakið finnist hvergi. Henni var tjáð að þetta væri í fyrsta skipti í sögu deildarinnar sem þetta kemur fyrir.

Lofar að hafa skilað ritgerðinni

Ásrún segir að það sé dýrt að prenta svona ritgerðir út og það hafi ekki komið til greina að prenta hana út aftur vegna mistaka skólans.

„Þetta kemur ekkert niður á einkunn eða neitt slíkt. Þetta er bara fyndið í rauninni. Ég lofa því að ég skilaði ritgerðinni.“

Ásrún hefur ekki enn fengið einkunn fyrir ritgerðina en býst við því fyrir mánaðarmót. Til þess að fagna áfanganum ætlar hún í Evrópureisu í haust. Eins og er vinnur Ásrún á leikskóla en vonast eftir því að fá einhverja vinnu tengda náminu í náinni framtíð.

Hér fyrir neðan má sjá Twitter-færsluna hennar Ásrúnar þar sem hún opinberaði um týndu BS-ritgerðina.

Jájá, deildin TÝNDI bara BS ritgerðinni minni!

Svona kemur bara fyrir mig, engan annan.
Í alvöru.
Þetta hefur aldrei gerst áður í HÍ.

— Ásrún Ísleifsdóttir (@asrunis) May 18, 2016