Björk lætur fjölmiðla heyra það eftir að hafa verið gagnrýnd fyrir plötusnúðasett

Tónlistarkonan Björk Guðmundsdóttir lætur fjölmiðla heyra það vegna umfjöllunar um plötusnúðasett hennar á tónlistarhátíðinni Day for Night í Bandaríkjunum um liðna helgi. Hún segir einhverja fjölmiðla ekki hafa geta skilið hvers vegna hún kom ekki fram sjálf með sína tónlist og hvers vegna hún faldi sig á bak við borð.

Hún segir nokkra af uppáhalds tónlistarmönnum sínum einnig hafa komið fram sem plötusnúðar á þessari hátíð, en þeir hafi ekki fengið sömu meðhöndlun frá þessum fjölmiðlum, og bendir á að um sé að ræða karlkyns kollega hennar í tónlistarheiminum.

„Mér finnst þetta vera kynjamisrétti,“ skrifar Björk á Facebook en hún nefnir að tónlistarmenn á borð við Aphex Twin, Arca, Oneoh Trixpoint Never og Matmos hefðu Dj-að á þessari hátíð.

Hún segist ekki geta hunsað þetta kynjamisrétti eftir þetta stormasama ár. „Því við eigum öll skilið algjöra breytingu á þessum byltingarkenndu tímum sem við lifum á. Það hlýtur að vera þess virði,“ skrifar Björk.

Hún segir konur í tónlist fá að vera söngvaskáld svo lengi sem þær syngja um kærasta sína. Ef þær syngja um atóm, stjörnuþokur, aðgerðastefnu eða gera eitthvað annað en að syngja um ástvini verða þær fyrir gagnrýni að sögn Bjarkar. „Blaðamönnum finnst eins og það vanti eitthvað,“ segir Björk og nefnir að það sé eins og að konur eigi bara að syngja um tilfinningar.

Björk segist hafa gert plöturnar Biophilia og Volta meðvituð um þá staðreynd að á þeim plötu yrði ekki sungið um það sem konur gera venjulega.

„Mér fannst ég hafa áunnið mér það,“ skrifar Björk.

Á Volta segist hún hafa sungið um barnshafandi hryðjuverkamenn og um sjálfstæði Færeyja og Grænlands.

Á Biophilia söng hún um stjörnuþokur og atóm.

„En það var ekki fyrr en á Vulnicura sem ég söng um ástarsorg sem ég fékk fullt samþykki fjölmiðla,“ segir Björk.

Hún segir karlmönnum leyfast að fara um víðan völl þegar kemur að umfjöllunarefni, takast á við vísindaskáldskap, vera fyndnir og  vera tónlistarnördar sem týnast í hljóðheimi.

„En ekki konur. Ef við opnum ekki brjóstholið og blæðum fyrir karlmenn og börnin í lífi okkar þá erum við að svíkja áheyrnarhópinn okkar.“

Hún segist þó finna fyrir því að breyting sé í nánd og segist vonast til þess að á árinu 2017 muni hún verða að veruleika.

Hér fyrir neðan má lesa stöðuuppfærslu Bjarkar um málið. 

Hér má sjá hluta af plötusnúðasetti hennar í Houston: