Mamma kaupir enn þá jólakjólinn

Harpa Káradóttir, förðunarfræðingur og höfundur bókarinnar Andlit, er komin með jólakjólinn fyrir þetta árið en það var mamma hennar sem valdi hann. Sömuleiðis er hún búin að plana hvernig hátíðarförðunin verður. En augun verða í aðalhlutverki.

Harpa fær ávallt hjálp frá móður sinni þegar kemur að jóladressinu. „ Ég kaupi mér ekki alltaf ný föt fyrir jólin en það er mjög furðulegt að vera næstum 30 ára og mamma mín kaupir enn yfirleitt jólakjólinn á mig. Hún á greinilega mjög erfitt með að sleppa tökunum en hún er með mjög góðan smekk og klikkar aldrei, þannig að þetta er nokkuð þægilegt,“ segir Harpa sem er himinlifandi með fyrirkomulagið. Þetta árið varð síður gulur flauelskjóll fyrir valinu hjá þeim mæðgum.

Eftirminnilegasta dress sem Harpa hefur klæðst á jólunum samanstendur af joggingbuxum og Landspítala-bol. „Ég átti dóttur mína á Þorláksmessu fyrir tveimur árum. Ég fékk að fara heim af spítalanum klukkan 17.30 á aðfangadag og jólin voru hringd inn á leiðinni heim. Það aðfangadagskvöld var ég í sömu joggingbuxunum og ég hafði farið í á fæðingardeildina, brjóstahaldaralaus og í bol frá Landspítalanum. Ég orga úr hlátri þegar ég skoða myndir frá þessu kvöldi,“ rifjar Harpa upp.

Aðspurð út í bestu tískujólagjöf sem hún hefur fengið nefnir Harpa forláta pels. „Besta jólagjöf sem ég hef fengið er líklegast pels sem ég fékk frá foreldrum mínum fyrir þremur árum. Ég nota hann mjög mikið.“

Mun skarta augnskuggum með málmáferð

En hvað með förðunina? „Ég ætla að láta augun vera aðalatriðið í förðuninni, hugsanlega blanda saman „metal“-gull, silfur og brúnum augnskuggum og toppa þetta með fallegum náttúrulegum gerviaugnhárum. Þegar augun eru áberandi er nauðsynlegt að halda augabrúnum og húðinni léttri og fallegri svo að þetta verði ekki allt saman of mikið. Þessa stundina er uppáhaldsvaralitasettið mitt MAC-varablýantur í litnum Stone og Honeylove varaliturinn sem er líka frá MAC. Ætli þessi tvenna verði ekki líka bara fyrir valinu, þetta er frekar „nude“-litur með smá brúnum tón og fer mjög vel við „metal“-augnförðun.