Strákarnir í FM95BLÖ „eyða“ milljón á dag: Borgaði Rikka G 150 þúsund fyrir að slá hann

„Djöfull var þetta gaman, líklega eitt það skemmtilegasta sem ég hef gert,“ segir Egill Einarsson, einkaþjálfari og útvarpsmaður, sem fékk það verkefni að eyða einni milljón á Snapchat-reikningi FM95BLÖ í gær.

Um er að ræða keppni á vegum smáforritsins Kass en Egill, Steindi Jr. og Auðunn Blöndal fá einn dag á mann. Sá sem gerir skemmtilegustu söguna á Snapchat vinnur 100.000 sem fara til góðgerðamála.

Egill fór hreinlega á kostum í gær en hann skellti sér í fegrunarmeðferð, fékk sér nóg af fæðubótarefnum, borgaði Rikka G 150.000 krónur fyrir að slá hann utan undir, og lét hann hella yfir sig kampavíni ofan í pottinum í Sporthúsinu.

Fyrsti dagurinn fór því vel af stað en líklega hefur Egill í raun ekki fengið heila milljón til að eyða í gær, myndbandið því meira til gamans gert.

Hér að neðan má sjá söguna sem birtist á Snapchat-reikningi FM95BLÖ (fm95blo).