Vinna á appelsínuhúð með kaffikorgi

„Verandi er snyrtivörulína stofnuð út frá Vakandi, en það eru samtök sem berjast fyrir vitundarvakningu um sóun og þá helst matarsóun. Hugsjónin á bak við Verandi er að endurnýta hráefni sem myndi annars vera hent,“ segir Rakel Garðarsdóttir, spurð út í nýja snyrtivörulínu sem hún og Elva Björk Bark­ar­dótt­ur, lög­fræðing­ur og ein af stofn­endum Litlu gulu hæn­unn­ar, fyr­ir­tæki sem fram­leiðir vel­ferðar­kjúk­ling, eru að koma með á markaðinn.

Um er að ræða lík­ams­skrúbb­ sem búinn er til úr kaffi, sem tilvalið er að endurnýja. Oftar en ekki er kaffi­korgn­um hent beint í ruslið þar sem hann end­ar í land­fyll­ingu, sem er að öllu leyti mjög óum­hverf­i­s­vænt.

„Fyrsta varan í snyrtivörulínunni Verandi er kaffiskrúbbur, þar sem við endurnýtum kaffikorg sem við fáum á kaffihúsum í Reykjavík, þurrkum hann og blöndum við olíur, þara og salt og er útkoman algjört dúndur,“ segir Rakel og bætir við að saltið sem þær fá sé íslenskt og ekki hægt að nýta til matar þar sem magnesíum­innihald þess er of hátt og því fullkomið í húðvörur.

Rakel og Elva eru báðar mjög umhverfisvænar, og eru umhverfis­mál þeim ofarlega í huga þegar kemur að þróun snyrtivaranna.

„Það er afar mikilvægt fyrir okkur að allt það sem er í vörunum okkar geti skilað sér í gegnum niðurfallið aftur út í sjó án þess að skaða nokkuð, hvorki húð okkar né sjóinn. Mikið af vörum sem eru á markaði í dag er stútfullt af eiturefnum sem eru skaðleg heilsu okkar, húð og ekki síst umhverfinu eins og sjónum,“ segir Rakel og bendir á að marg­ar nothæfar snyrti­vör­ur megi finna í eld­hús­inu á flest­um heim­il­um og því alls ekki þörf fyr­ir all­ar þær kemísku vör­ur sem eru á markaðnum í dag.

En hvernig datt ykkur í hug að nota kaffikorg?

Þetta byrjaði allt þegar við Rakel sátum á kaffihúsi og vorum að velta því fyrir okkur hversu mikið af kaffikorg er hent eftir að vera nýttur í einn kaffibolla. Kaffi sem er flutt yfir hálfan hnöttinn. Eitt leiddi af öðru og við byrjuðum að upphugsa leiðir til þess að nýta korginn. Við fórum fljótlega að gera tilraunir í eldhúsi Matís, þar sem við þróuðum vöruna og ekki leiða löngu þar til við fundum hina fullkomnu blöndu fyrir líkamsskrúbb sem endurnærði húðina og gerði hana silkimjúka og ljómandi,“ segir Elva Björk

„Kaffið er líka enn stútfullt af næringarefnum sem dekra við húðina, en það þykir einstaklega gott til að vekja húðina og vinna á kvillum eins og appelsínuhúð,“ bætir Rakel við.

Sem stendur eru fleiri vörur frá Verandi á leið á markað bæði hérlendis og erlendis svo sem hárvörur eins og sjampó og næring, handsápur, andlitsmaski og fleira.

„Við erum á fullu í þróun á nýjum vörum, og með okkur í teymi er grafíski hönnuðurinn Egill Þórðarson. Allar vörurnar verða byggðar á sama lögmáli þar sem við notum hreint íslenskt hráefni. Það er nefnilega í höndum okkar einstaklinganna að hjálpast að, að huga betur að umhverfi okkar og jörðinni,“ segir Rakel.

Fréttin birtist fyrst í Fréttablaðinu 11. nóvember.