Strípulaus Nik Kershaw og Todmobile kveiktu í Eldborgargestum

Kolbeinn Tumi Daðason skrifar 14. nóvember 2016 22:15

Óhætt er að segja að áhorfendur á tónleikum Todmobile og 80’s stjörnunnar Nik Kershaw hafi fengið eitthvað fyrir peninginn og gott betur á tónleikum í Eldborgarsal Hörpu á föstudagskvöldið. Tónleikarnir voru afar vel sóttir og góð stemning í salnum frá fyrsta lagi. Eftirvæntingin hjá tónleikagestum leyndi sér ekki og voru þó nokkrir gestir sem leyfðu sér að syngja með lögunum og sveifla sér í sætunum. Fóru þar fremstar í flokki nokkrar konur á fremsta bekk sem voru svo sannarlega komnar til að skemmta sér.

Allir helstu slagarar Todmobile fengu að hljóða, allt frá Tígurlaga Dal og Pöddulaginu yfir í Eldlagið og að sjálfsögðu Brúðkaupslagið þar sem Andrea og Eyþór Ingi stigu brúðkaupsdansinn eins og segir í laginu sem hver einasti Íslendingur hlýtur að kunna að meta. Eitt hljómborða Kjartans hljómboðsleikara var ekki að virka á sviðinu en hann lét það ekki slá sig útaf laginu. Hermaurinn var svo auðvitað á sínum stað sem ég ímynda mér að Andrea og Þorvaldur Bjarni gætu sungið aftur á bak ef því er að skipta.

Eftir þéttan Todmobile pakka fyrir hlé og verðskuldaða pásu mætti sveitin aftur á svið og ljóst að styttist í uppáhald Eiðs bassaleikara, hinn 58 ára gamla Nik Kershaw, silfurref sem skartaði rándýrum strípum þegar hann var upp á sitt besta. Áður en hann steig á svið tók Todmobile lögin sem áhyggjufullir tónleikagestir voru farnir að efast um að yrðu tekin og því voru allir mettir af Todmobile þegar Kershaw var kynntur til leiks, strípulaus en grár og flottur í hárinu.

Todmobile og Nik Kershaw! Vááá!

A photo posted by Friðgeir Bergsteinsson (@fridgeirb) on Nov 11, 2016 at 3:04pm PST

Kershaw tók öll sín helstu lög með Todmobile og lauk kvöldinu með uppklappslaginu og mögulega hans þekktasta lagi, I won’t Let The Sun Go Down On Me. Fólk söng með Kershaw sem gaf af sér á milli laga og ræddi við tónleikagesti. Kershaw og Todmobile smellpössuðu saman sem reyndar var alltaf líklegt miðað við útgáfu The Riddle sem Todmobile og Kershaw gerðu í aðdraganda tónleikanna.

Tónleikarnir slógu vafalítið á einhver nostalgíuköst og voru vel til fundið framtak hjá Todmobile sem hafa áður haldið tónleika með erlendum poppstjörnum, þeim Jon Anderson úr Yes og Steve Hackett úr Genesis. Það var einmitt Hackett sem var milliliður sveitarinnar og Kershaw.

Tónleikagestir virtust sáttir með þetta ýmist poppaða eða rokkaða kvöld í Eldborg en myndir frá tónleikunum má sjá hér að neðan. Þá var Greta Salóme formlega tekin inn í Todmobile fjölskylduna en segja má að hún með fiðluna sína leysi Eyþór Arnalds og sellóið af hólmi.

Eyþór Árnason, ljósmyndari fréttastofu, var á staðnum og tók meðfylgjandi myndir.

Mest lesið

Fleiri fréttir

Mest lesið

Fleiri fréttir

Mest lesið

Tarot dagsins