Formúla 1

Bílskúrinn: Krassandi keppni í Mexíkó

Kristinn Ásgeir Gylfason skrifar
Menn fögnuðu eftir keppnina.
Menn fögnuðu eftir keppnina. Vísir/Getty

Lewis Hamilton á Mercedes kom fyrstur í mark og minnkaði forskot liðsfélaga síns í heimsmeistarakeppni ökumanna niður í 19 stig þegar tvær keppnir eru eftir.

Mannasiðir Mercedes manna, orðbragð Sebastian Vettel og aksturslag Max Verstappen koma fyrir í Bílskúrnum, uppgjöri hvers kappaksturs hér á Vísi.

Daniel Ricciardo fékk loksins verðlaunagripinn sinn. Vísir/Getty

Orðbragð og aksturslag Sebastian Vettel
Vettel fékk 10 sekúndna refsingu eftir að hafa að mati dómara keppninnar lokað harkalega á Daniel Ricciardo undir hemlun.

Vettel var þegar búinn að fá þriðja sætis verðlaunin afhent, eftir að Verstappen ahfði fengið refsingu vegna þess að hann ók utan brautar til að forðast að tapa sæti sínu til Vettel. Ricciardo varð svo þriðji maðurinn til að verða í þriðja sæti í einni og söma keppninni.

Vettel blótaði Charlie Whiting og Max Verstappen í sand og ösku í talstöðvakerfinu. Maurizio Arrivabene, liðsstjóri Ferrari þurfti að biðja Vettel um að slaka á.

Vettel mun sleppa við refsingu vegna orðbragðsins en fór á fund Charlie Whiting, yfirdómara í Formúlu 1 til að biðjast afsökunnar a ummælum sínum.

Max Verstappen á brautinni í Mexíkó. Vísir/getty

Aksturslag Max Verstappen
Verstappen sagði eftir á að Vettel þyrfti að læra að verjast undir hemlun ef hann ætlaði að nota þá taktík. Svo virðist sem Verstappen geti vel haldið haus í viðtölum þegar mikil pressa er á honum. Þetta aksturslag sem Vettel sýndi hefur verið einskonar einkennismerki Verstappen og því afar skondið að hann skuli skjóta því að Vettel að hann þurfi að læra að framkvæma það.

Hann benti Vettel á að fara aftur í skóla og læra mannasiði þegar hann heyrði af blótsyrðum Þjóðverjans.

Verstappen tók eins og áður segir þá ákvörðun að fara yfir grasið á milli fyrstu og annarrar beygju til að verjast því að missa þriðja sætið til Vettel.

Vettel fannst ásamt fleirum að hann ætti að láta sætið af hendi til sín. Verstappen var ósammála og hélt sínu þriðja sæti. Dómarar keppninnar voru hins vegar á öðru máli og ákváðu að veita Verstappen 5 sekúndna refsingu sem færði hann niður í fimmta sæti á þeim tíma. Hann hafnaði svo í fjórða sæti að endingu, eftir að Vettel hafði seinna fengið sína refsingu. 

Mercedes menn leiddu inn í fyrstu beygju, Hamilton með allt í lás. Vísir/Getty

Mannasiðir Mercedes manna
Mercedes mennirnir Lewis Hamilton og Nico Rosberg voru í fyrsta og öðru sæti í keppninni og voru svona að megninu til á auðum sjó.

Mercedes liðið hins vegar sýndi góða mannasiði með því að láta ökumennina keppa, halda áfram og ekki gugna undan tilraun Vettel til að vinna keppnina.

Hamilton læsti framdekki á leiðinni inn í fyrstu beygju eftir ræsingu og hefði gjarnan vilja skiðta því undan bílnum. Það hefði þó þýtt að hann hefði tapað stigum á Rosberg í keppninni og því kallaði liðið hann ekki inn á þjónustusvæðið.

Mercedes menn leyfðu svo ökumönnum sínum að aka þá keppnisáætlun sem þurfti til þess að tryggja liðinu sigur og ökumönnum þess sem sanngjarnasta innri baráttu um heimsmeistaratitil ökumanna.

Vel gert Mercedes!

Hamilton var sáttur með keppnina í Mexíkó. Vísir/Getty

Getur Hamilton orðið heimsmeistari
Já er stutta svarið en flókna svarið er frekar; nei það er ólíklegt.

Ef Rosberg vinnur næstu keppni í Brasilíu þá verður hann heimsmeistari, sama hvað Hamilton gerir. Raunar er staðan einfaldlega sú að ef Rosberg vinnur sér inn 7 stig eða meira í Brasilíu gagnvart Hamilton þá verður Rosberg heimsmeistari. Enda þá forskot hans meira en stigin sem fást fyrir að vinna og einungis ein keppni eftir.

Staðreyndin er því sú að ef allt gengur eðlilega fyrir sig hjá Mercedes, þá verður Rosberg heimsmeistari. Ef hins vegar eitthvað kemur uppá hjá honum þá á Hamilton raunhæfa möguleika. Rosberg hefur hins vegar unnið síðustu tvö ár í Brasilíu svo hann kann klárlega vel við sig þar.

Ætli Hamilton hafi hugsað... ég svíf. Vísir/Getty

Ökumaður dagsins
Lewis Hamilton verður að teljast ökumaður dagsins að mati blaðamanns. Hann einfaldlega stjórnaði keppninni af mikilli yfirvegun og ók vel. Hann var að glíma við ofhitnandi pústkerfi megnið af keppninni sem honum tókst að tækla og hann gerði allt sem hann gat til að halda spennunni í heimsmeistaramótinu.

Sebastian Vettel var kjörinn ökumaður dagsins af áhorfendum á Formula1.com. Hins vegar lauk þeirri kosningu áður en refsing hans kom til og því verður ekki mikið mark tekið á henni hér.


Tengdar fréttir

Sebastian Vettel tapar þriðja sætinu

Sebastian Vettel hefur tapað þriðja sætinu sem hann hlaut í mexíkóska kappakstrinum í gær. Hann fékk tíu sekúndna refsingu fyrir reikult aksturslag þegar hann varðist Daniel Ricciardo.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.