Skoðun
Ingibjörg Kristinsdóttir, formaður stjórnar Félags náms- og starfsráðgjafa.

Vönduð stefnumótun grunnforsenda markvissrar þjónustu náms- og starfsráðgjafa

Ingibjörg Kristinsdóttir skrifar

Í dag, 20. október, er Dagur náms- og starfsráðgjafar haldinn hátíðlegur í tíunda sinn. Markmið dagsins er annars vegar að vekja athygli á og kynna náms- og starfsráðgjöf fyrir almenningi og stjórnvöldum og hins vegar að skapa vettvang til að sameina og efla náms- og starfsráðgjafa. 

Að þessu sinni viljum við benda sérstaklega á mikilvægi vandaðrar stefnumótunar sem grunnforsendu markvissrar þjónustu náms- og starfsráðgjafa. Nú þegar hefur nokkur stefnumótunarvinna átt sér stað í samvinnu aðila frá mennta- og menningarmálaráðuneyti, velferðarráðuneyti, atvinnuvega- og nýsköpunarráðuneyti, Félagi náms- og starfsráðgjafa og fleiri hagsmunaaðila. Í skýrslu starfshópsins er réttilega bent á að vegna mikilla breytinga á vinnumarkaði síðari ár sé náms- og starfsval mun flóknara ferli en áður. Í alþjóðlegu samhengi er það viðurkennd staðreynd að náms- og starfsráðgjöf gegnir lykilhlutverki í þessum breyttu aðstæðum, ekki síst vegna þess hve mikilvægt er fyrir ungt fólk að taka vel ígrundaðar ákvarðanir. Brotthvarf úr námi hefur í för með sér mikið óhagræði og kostnað bæði fyrir þá sem hverfa frá námi sem og þjóðfélagið allt. Samkvæmt tölum frá OECD er brotthvarf íslenskra ungmenna nú um 30% en það er mun hærra en í nágrannalöndum okkar. Náms- og starfsráðgjafar hafa lengi gefið þessu gaum og viljað leggja sitt af mörkum en rannsóknir sýna fram á ótvírætt forvarnargildi náms- og starfsráðgjafar og náms- og starfsfræðslu gegn brotthvarfi.

Alþjóðlegar breytingar á vinnumarkaði kalla einnig á aukna eftirspurn náms- og starfsráðgjafar fyrir fullorðna. Fræðslumiðstöð atvinnulífsins, símenntunarstöðvar, Vinnumálastofnun og aðilar sem koma að endurhæfingarmálum sinna þessum hópi sérstaklega. Í skýrslunni góðu er greint frá því að stjórnvöld hafi sett sér það markmið að ekki fleiri en 10% fólks á vinnumarkaði verði án viðurkenndrar starfs- eða framhaldsskólamenntunar árið 2020. Í ljósi þessa er mikilvægt að upplýsingar um nám og störf séu aðgengilegar, sem og þjónusta náms- og starfsráðgjafa.

Starfshópur um stefnumótun í náms- og starfsráðgjöf skilaði af sér í maí 2015. Niðurstöðurnar hafa enn ekki fengið efnislega umfjöllun og úrvinnslu hjá stjórnvöldum.  Drög að stefnu um náms- og starfsráðgjöf á Íslandi liggja nú fyrir og næsta skref er að vinna áfram á þeim grunni sem kominn er.

Stórefld menntun og sterk tengsl á alþjóðavettvangi fagsviðsins skipa íslenskum náms- og starfsráðgjöfum í fremstu röð. Við erum reiðubúin að inna af hendi þann stuðning sem nemendur og atvinnuleitendur þurfa á að halda í dag með þeim augljósa þjóðhagslega ávinningi sem hann hefði í för með sér. Skýr stefnumótun og heildræn áætlun um hvar kröftum okkar er best varið er nauðsynleg í náinni framtíð. Því viljum við í tilefni Dagsins óska eftir frekara samtali við yfirvöld menntamála á þeim góða grunni sem þegar hefur verið lagður.

Fyrir hönd stjórnar Félags náms- og starfsráðgjafa
Ingibjörg Kristinsdóttir, formaður
 



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Skoðun

Sjá meira


Velkomin á Vísi. Þessi vefur notar vafrakökur. Sjá nánar.