Fellibylurinn Matthew veldur usla á Haítí

Einn öflugasti fellibylur síðustu ára hefur gengið á land á Haíti í Karíbahafi. Íbúar hafa búið sig undir miklum vindhviðum og gríðarlegu úrhelli.

Í frétt BBC segir að fellibylurinn Matthew, sem flokkast sem fjórða stigs fellibylur, hafi gengið á land á Haítí um klukkan ellefu í morgun að íslenskum tíma.

Bandarísk yfirvöld búast við lífshættulegum aðstæðum á eyjunni og segir Jocelerme Privert, starfandi forseti Haítí, að þegar hafi borist fréttir af því að fólk hafi látið lífið. Fyrst og fremst sé um fólk á bátum á hafi úti sem hafi ekki virt viðvaranir yfirvalda.

Búist er við að vindhviður fari upp í allt að 64 metra á sekúndu. Talið er að samfara miklu úrhelli megi búast við miklum flóðum og aurskriðum.

Haítí er eitt fátækasta ríki heims og búa fjölmargir íbúar á svæðum þar sem aurskriður og flóð eru tíð.