Keyrði næstum því á fimm ára dreng: „Ég náði að stoppa í tíma“

Betur fór en á horfðist hjá Guðrúnu Daníelsdóttur og fimm ára dreng í gær þegar Guðrún var næstum því búin að keyra á drenginn. Lögreglan á höfuðborgarsvæðinu deilir Facebook-færslu Guðrúnar á síðu sinni í dag með leyfi hennar þar sem lögreglan telur hana eiga erindi við alla.

Í færslunni lýsir Guðrún aðstæðum þegar hún keyrði næstum því á barnið en klukkan var korter í átta og ljósaskipti úti.

„Ég keyrði á 50 km hraða og allt í einu hljóp fimm ára gutti í veg fyrir bílinn minn. Hann var húfulaus í ljósgrænum jakka og kom hlaupandi úr myrkrinu yfir götuna. Það eina sem ég sá var upplýst andlit hans þegar hann hljóp í veg fyrir mig.“

Guðrún skrifar að hún hafi aldrei bremsað jafn fast. Allur líkami hennar hafi bremsað, bílbeltið þrýsti henni niður í sætið, hausinn sveigði fram og það var líkt og hún hefði ekið á vegg.

„Barnið fraus líka og í sekúndubrot náðum við augnsambandi meðan allir góðir vættir hjálpuðu okkur. Bíllinn staðnæmdist og barnið lagði hendina sína á húddið. Ég hljóp út og faðmaði hann. Hann endurtók í sífellu „fyrirgefðu fyrirgefðu.“ Eftir smástund hljóp hann heim til sín endurskinslaus og lafhræddur.“

Guðrún lýsir því síðan að hún hafi keyrt áfram, fundið bílastæði og beðið eftir að skjálftinn í líkama hennar myndi líða hjá. Hún fer síðan yfir það að þegar þetta gerðist hafi hún verið með alla athyglina á veginum en játar að vera alltof með athyglina einhvers staðar annars staðar undir stýri:

„Akkúrat þessa stund var ég ekki að tala í símann, ég var ekki að senda SMS, ég var ekki að fletta í contöktum og ég var ekki að stilla útvarpið. Athygli mín þessar handahófskenndu sekúndur var öll á veginum. Ég náði að stoppa í tíma. Ég verð að viðurkenna að það var heppni. Ég er alltof oft að gera eitthvað annað meðan ég er að keyra. Alltof oft. Í gærkvöldi átti ég erfitt með að sofna. Ég sá barnið upplýst af framljósunum og um mig fór hrollur því ég áttaði mig á því að þetta hefði getað farið verr. Hefði ég verið í símanum þá ......guð minn góður. Aldrei aftur.“