Bjó með líki ömmu sinnar í hálft ár

Lögreglan í New York handtók mann um þrítugt á fimmtudaginn sem hafði deilt íbúð með líki ömmu sinnar svo mánuðum skiptir.

AP fréttaveitan greinir frá þessu á vef sínum en þar kemur fram að maðurinn, Christopher Fuhrer, hafi óttast að hann þyrfti að flytja úr íbúðinni, sem var í eign ömmu hans, ef hann greindi yfirvöldum frá andláti hennar.

Þess í stað hafi hann ákveðið að vefja fjölmörgum plast- og ruslapokum um lík hennar ásamt því að kaupa ógrynni ilmspjalda, ekki ósvipuðum þeim sem hengd eru í baksýnisspegla bifreiða. Það gerði hann til að vinna bug á óþefnum.

Það var móðir Fuhrers og dóttir gömlu konunnar sem fór fram á að málið yrði rannsakað eftir að hún hafði ekki heyrt frá móður sinni í um hálft ár. Þegar lögreglan spurði manninn út í líkið sagði Fuhrer að hann hafi óttast að verða heimilslaus ef einhver kæmist á snoðir um andlátið.

Lögregluembættið í New York rannsakar nú dánarorsökina en ekki er talið að andlátið hafi borið að með saknænum hætti. Fuhrer hefur hins vegar verið ákærður fyrir að leyna yfirvöld upplýsingum.