Peres borinn til grafar

Leiðtogar víðsvegar að úr heiminum koma nú saman í Ísrael til að vera viðstaddir útför Shimon Peres, fyrrverandi forseta og forsætisráðherra landsins.

Peres lést á miðvikudag, 93 ára að aldri. Á meðal þeirra sem eru viðstaddir eru Barack Obama Bandaríkjaforseti og Mahmoud Abbas, leiðtogi Palestínumanna, sem hefur ekki komið til Ísrael í sex ár. Gríðarleg öryggisgæsla er við útförina.

Heimsókn Abbas hefur þegar vakið deilur, jafnt í Ísrael sem og í Palestínu, en Abbas vann með Peres að Oslóarsamkomulaginu, sem sá síðarnefndi fékk síðan Friðarverðlaun Nóbels fyrir.

Bill Clinton, fyrrverandi Bandaríkjaforseti, og Benjamin Netanyahu, forsætisráðherra Ísraels, eru í hópi þeirra sem fluttu ræðu við athöfnina.

Benedikt Ásgeirsson, sendiherra Íslands gagnvart Ísrael, er fulltrúi íslenskra stjórnvalda við útförina.