Menning

Fundur fólksins

Gunnþóra Gunnarsdóttir skrifar
Aðalatriðið er að fólk hlusti hvert á annað, hvort sem það er sammála eða ekki að sögn Ingibjargar Grétu.
Aðalatriðið er að fólk hlusti hvert á annað, hvort sem það er sammála eða ekki að sögn Ingibjargar Grétu. Vísir/Anton Brink


„Hér er um að ræða lýðræðis- og stjórnmálahátíð þar sem rætt verður um samfélagsmál í sinni víðustu mynd á afslappaðan hátt,“ segir Ingibjörg Gréta  um Fund fólksins sem haldinn er í Norræna húsinu á morgun og laugardag.  Hann er að norrænni fyrirmynd þar sem áratuga hefð er fyrir svona hátíðum.  

„Árið 1967 var Olof Palme í sumarfríi á Gotlandi í Svíþjóð og var búinn að lofa konunni sinni að skipta sér ekkert af pólitík í heila viku. Hún var ekki búin að snúa sér við til að láta sólina skína á bakið, þegar hann var kominn upp á vörubílspall að tala um pólitík. Síðan hefur þessi umræðuhátíð orðið að hefð í Almedalen á Gotlandi. Nú kallast hún Almedalsveckan því hún stendur heila viku,“ lýsir Ingibjörg Gréta og heldur áfram.

„Eygló Harðardóttir félagsmálaráðherra fór á Almedalsveckan fyrir nokkrum árum og áttaði sig á að Ísland væri hið eina af Norðurlöndunum sem ekki hefði komið svona samtalshátíð á. Norræna húsið startaði henni svo hér í fyrra með norrænu ráðherranefndina á bak við sig. Aftur er hátíðin í Norræna húsinu og í ár stendur ríkisstjórnin að henni. Almannaheill, samtök friðargeirans, voru fengin til að sjá um framkvæmdina og ég er starfsmaður þeirra núna.

Hátíðin er opin öllum, körlum og konum, og aðgangur er ókeypis. Það er gaman að sjá hvað fólk tekur henni opnum örmum því stofnanir, félagasamtöl og einstaklingar verða með um 100 viðburði í og kring um Norræna húsið á þessum tveimur dögum frá klukkan 11 til 18. Allt byggist á samtali og siðareglur hátíðarinnar snúast um að fólk hlusti á hvert annað og þó engin niðurstaða fáist í málin þá er það bara niðurstaðan.“

Dagskrána má nálgast á heimasíðu hátíðarinnar, fundurfolks­ins.is og þar ættu allir að geta fundið viðburði við hæfi eftir áhuga.  http://fundurfolksins.is/dagskra/

 

Greinin birtist fyrst í Fréttablaðinu 1. september 2016.

 


Tengdar fréttir

Þurfum að ræða hlutverk og tilgang listarinnar

Samfélag án lista? Er yfirskrift áhugaverðra pallborðsumræðna á vegum Listaháskóla Íslands á Fundi fólksins. Rektor skólans, Fríða Björk Ingvarsdóttir, er á meðal þátttakenda ásamt fleira áhugaverðu fólki.






Fleiri fréttir

Sjá meira


×