Stoltgangan 2016 – tökum þátt !

Átak, félag fólks með þroskahömlun, stendur fyrir Stoltgöngunni næsta laugardag, 3. september. Lagt verður af stað frá Austurvelli kl. 11.30 og gengið að Norræna húsinu. Tilgangur göngunnar er að vekja athygli á tilveru fólks með þroskahömlun í fjölbreyttu samfélagi nútímans, gleðjast saman og leggja áherslu á að öll erum við mikilvægir einstaklingar í litrófi mannlífsins og eigum að vera stolt af tilveru okkar.

Mesta gæfa lífs míns er að hafa eignast börnin mín tvö. Þau eru ólík á margan hátt, eru hvort af sinu kyninu og raðast mismunandi á þau róf tilverunnar sem við búum í. Þau eru bæði að feta skrefin sín sem fullorðnir einstaklingar í samfélagi okkar. Hvort um sig leggur sín lóð á vogarskálar þess að skapa samfélag fjölbreytileikans þar sem ólíkir einstaklingar mynda eina órjúfanlega heild sem við köllum samfélag okkar mannanna. Upplag þeirra er um margt ólíkt og í lífi þeirra felast ýmis tækifæri, verkefni, gleði og sorgir sem þau hafa tekist á við og notið eftir því sem gefið hefur hverju sinni.

Hversu oft hefur móðirin ekki glaðst yfir smáum sem stærri sigrum, upplifað gleðina yfir frumkvæði og velgengni, huggað og hvatt áfram í mótlæti, verið yfir og allt um kring þegar á hefur reynt og elskað sitt unga fólk. Endalaust hef ég verið stolt af unga fólkinu mínu sem lifir lífi sínu á eigin og ólíkum forsendum, þarfnast mismikils stuðnings í lífinu en eru bæði tvö jafn mikilvægir þátttakendur í lífinu.

Ég mun taka þátt í Stoltgöngunni næsta laugardag og fagna fjölbreytileikanum sem felst í ólíkum einstaklingum samfélagsins. Ég mun ganga stolt með fötluðum syni mínum og Átaksfólki því þó við göngum á ólíkan hátt í lífinu þá göngum við öll í sömu átt, leið sem við viljum að leiði til meiri sýnileika, fleiri tækifæra og aukinna mannréttinda fatlaðs fólks.

Ég skora á foreldra, systkini, vini og aðra aðstandendur fólks með þroskahömlun að fjölmenna í Stoltgönguna og ganga fagnandi þessa vegferð með okkur. Þá hvet ég alla þá sem umhugað er um fjölbreytt samfélag til að fjölmenna í gönguna. Það skiptir máli að við stöndum saman og göngum saman því þannig erum við sterkara, sýnilegra, litríkara og fjölbreyttara göngufólk, jafnt í Stoltgöngunni sem lífsgöngunni allri.

Þessi grein birtist upphaflega í Fréttablaðinu.