Innlent

Miklum árangri náð með Breiðholtsmódelinu

Þórhildur Þorkelsdóttir skrifar
Börnum úr Breiðholti sem koma inn á göngudeild BUGL hefur fækkað um 56 prósent á undanförnum fimm árum. Sérfræðingur hjá þjónustumiðstöð Breiðholts segir það vera meðal annars vegna þess að gripið sé fyrr inn í en áður þegar grunur er um að börn glími við fjölþættan vanda.

Hið svokallaða Breiðholtsmódel var tekið í gagnið í Breiðholti árið 2007 og hefur verið í stöðugri þróun síðan. Í kerfinu er brugðist við mismunandi þörfum barna áður, á meðan, og í sumum tilfellum í stað þess að senda þau í greiningarferli við ADHD og öðrum fjölþættum vanda. Sá tími er oft dýrmætur fyrir þroska barnsins en greingarferlið getur tekið allt að þrjú ár.

„Við erum að tala um börn með tilfinningavanda, hegðunarvanda, námsvanda hvort sem hann er sértækur eða ekki og úrræðin eru í  takt við það. Við getum boðið upp á sálfræðiviðtöl og sérfræðiviðtöl, tengt fólk við kennsluráðgjafa og félagsráðgjafa. Það kemur upp vandi, skólinn hefur sanband og það er brugðist við tiltölulega fljótt“, segir Hákon Sigursteinsson sálfræðingur og deildarstjóri þjónustumiðstöðvar Breiðholts.

Kerfið er í raun hugsjónarvinna sem gefið hefur góða raun, þrátt fyrir að fjármagn til þess hafi verið af skornum skammti.

„Milli áranna 2011 og 2015 fækkar börnum sem koma inn á göngudeild BUGL frá Breiðholti um 56 prósent. Árið 2007 þegar við byrjuðum á þessu þá enduðu um 41 prósent erinda sem enduðu í svokölluðu greiningarferli. Í dag eru sjö prósent erinda sem enda þar af þeim beiðnum sem koma hingað frá grunnskólunum. Auðvitað þarf alltaf einhver fjöldi barna á umfangsmeiri hjálp að halda, hvort sem það er lyfjameðferð eða eitthvað annað. En það er samt meirihlutinn sem þarf fræðslu, ráðgjöf og þjónustu við bæði börn og foreldra,“ segir Hákon.

Hann telur mikilvægt að ríki og sveitarfélög komi saman að borðinu og ákveði hvernig hátta skal málum barna með fjölþættan vanda í leik- og grunnskólum landsins. Í dag getur allur gangur verið á því eftir sveitarfélögum. Samræma þurfi verklag til að gera betur.

„Mér finnst að það þurfi að byrja á því að setjast niður og ákveða hvernig á að hafa þetta. Það hefur ekki verið gert.“


Tengdar fréttir

„Vona að sagan hennar verði til þess að forða einhverjum frá því að prófa fíkniefni og enda á þennan hræðilega hátt“

Móðir 17 ára stúlku sem lést í júní í fyrra eftir að hafa tekið inn eina og hálfa E-töflu vonar að saga dóttur sinnar nýtist til að bjarga börnum og ungmennum í svipaðri stöðu, það er þeim sem eru með fjölþættan vanda og lenda utanveltu í kerfinu. Taka þurfi betur utan um þau og viðurkenna þau á þeirra eigin forsendum.

Ekki vitað um fjölda barna með ADHD hér á landi

Ekki eru til tölur um fjölda barna sem greind eru með ADHD hér á landi þrátt fyrir fyrirmæli Landlæknis um að skráning á greingingunni sé skýr. Formaður ADHD samtakanna segir brýnt að samræmd skráning verði skýr í lögum svo hægt sé að taka til hendinni í málaflokknum.

Mörg börn með ADHD í sambærilegum vanda og Ingibjörg Melkorka

Sérfræðingur í málefnum barna með ADHD segir að fjöldi barna með greininguna lendi í áhættuhópi gagnvart áhættuhegðun og fíkniefnaneyslu. Aukið fjármagn þarf í málaflokkinn þar sem eru viðvarandi biðlistar, en það getur tekið allt að þrrjú ár að fá ADHD greiningu hjá Þroska-og hegðunarstöð Heilsugsæslunnar.

Sextíu prósent fanga á Íslandi með ADHD

"Þetta er mesta sóun sem hægt er að hugsa sér", segir framkvæmdastjóri ADHD samtakanna, en yfir sextíu prósent fanga í íslenskum fangelsum eru haldnir ADHD, eða ofvirkni með athyglisbresti. Úrræði vantar fyrir fanga með greininguna hér á landi.

Ekki nóg að setja bara peninga í að stytta biðlista

Formaður starfshóps sem vinnur nú að því að endurskoða stöðu barna með ADHD hér á landi segir ekki lausnina að setja peninga í að stytta biðlista. Aðgerðir þurfi til að koma í veg fyrir að þeir myndist með því að skoða heildarsamhengið.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.