Ekki nóg að setja bara peninga í að stytta biðlista

Formaður starfshóps sem vinnur nú að því að endurskoða stöðu barna með ADHD hér á landi segir ekki lausnina að setja peninga í að stytta biðlista. Aðgerðir þurfi til að koma í veg fyrir að þeir myndist með því að skoða heildarsamhengið.

Stöð 2 hefur undanfarið fjallað um stöðu barna með ADHD á Íslandi, en tölur um nákvæman fjölda barna með greininguna liggja ekki fyrir. Það er þó staðreynd að þessi börn eru er líklegri en aðrir til að fara út af sporinu, leiðast út í fíkniefnaneyslu og áhættuhegðun, en talið er að sextíu prósent fanga í íslenskum fangelsum séu með ADHD.

Hafrún Kristjánsdóttir leiðir starfshóp sem undanfarið hefur rannsakað stöðu barna með ADHD eða fjölþættan vanda. Hún segir ljóst að hægt sé að gera betur í málaflokknum.

„Það var ákveðið að skoða þetta umhverfi, þjónustuferla, þjónustu og stuðning við börn með ADHD og sú vinna er hreinlega bara í gangi núna. Okkar hlutverk er að skoða hvernig við getum hjálpað þessum börnum sem eiga í vanda fyrr,“ segir Hafrún.

Barnaréttarnefnd Sameinuðu Þjóðanna gerði úttekt á heilbrigðismálum barna fyrir fimm árum þar sem lýst var yfir áhyggjum á vaxandi fjölda barna hér á landi sem greinast með ofvirkni og athyglisbrest eða svipaðar raskanir. Einnig hafði nefndin áhyggjur af löngum biðlistum eftir greiningu og meðferð.

Í skýrslu ríkisendurskoðunar frá því í febrúar kemur fram að sá langi biðtími sem sem hefur einkennt geðheilbrigðis-þjónustu við börn og unglinga sé óviðunandi, og stefni langtímahagsmunum og velferð þeirra í tvísýnu.

„Auðvitað viljum við ekki hafa biðlista en það er ekkert alltaf lausnin að setja hundrað eða tvö hundruð milljónir í að draga niður biðlista í einhvern smá tíma. Það þarf náttúrulega bara að gera þetta þannig að þetta vandamál komi ekki alltaf aftur og aftur upp. Að þessir löngu biðlistar myndist. Og það er okkar hlutverk að skoða hvernig hlutirnir eru í heildarsamhengi og koma með tillögur að úrbótum. Það munum við gera og svo sjáum við hvað setur,“ segir Hafrún.