Puttar þaktir bleki í 20 ár

„Sýningin er haldin vegna 20 ára afmælis Blek. Það hét fyrst Blek og breyttist síðan í Neo-Blek. Þarna til sýnis eru teikningar frá ýmsum teiknurum sem hafa teiknað í blaðinu: Hugleiki Dagssyni, mér, Inga Jenssyni, Kjartani Arnarsyni og fleiri. Í tilefni þess gaf ég út stærra blað en venjulega, 164 blaðsíður. Þetta eru íslenskar myndasögur og að hluta til erlendar, frá Frakklandi og blaðið kemur út í mjög takmörkuðu upplagi,“ segir Jean Posocco, einn af aðstandendum sýningarinnar ásamt Birni Vilhjálmssyni og Þorsteini S. Guðjónssyni, en hann var í óðaönn við að hengja upp myndir þegar blaðamaður náði tali af honum.

Hazarblaðið Blek var fyrst gefið út á vegum Hins Hússins og spratt upp úr átaksverkefni fyrir unga atvinnuleitendur. „Ég kom inn í þetta frá og með öðru tölublaði en það var hann Björn Vilhjálmsson sem startaði þessu í Hinu Húsinu á sínum tíma, árið 1996. Hann fékk þarna fullt af teiknurum með sér, mest ungir menn sem vildu teikna og búa til blað. Ég kom inn í þetta dæmi ári seinna, þá hitti ég Björn óvart og í framhaldi af því bauð hann mér í Hitt Húsið til að ræða um myndasögugerð við þessa krakka. Ég bauð mig fram í að vera í ritstjórn þarna þetta kvöld og þannig hefur það verið síðan þá. Björn Vilhjálmsson var ábyrgðarmaður til 2004 og þá tók ég alfarið við því.“

„Blaðið var fyrst gefið út einu sinni á ári og svo var tekin ákvörðun um að reyna að koma þessu út á þriggja eða fjögurra mánaða fresti. Markmiðið fyrst var að fá íslenska teiknara til að teikna í öll blöðin, en það tókst misjafnlega vel að fá teiknara í blaðið þannig að við brugðum á það ráð að kaupa erlent efni, frá Belgíu og Frakklandi, og það varð kikk í sölunni – fyrstu árin var Blek ekki í sölu neins staðar, bókabúðir vildu ekki fá þetta því að þetta var í undarlegri stærð og eitthvað þannig. Þetta var neðanjarðarútgáfa þangað til að ég breytti stærðinni í A4, þá gekk betur að koma þessu blaði í sölu og bókasöfnin urðu áskrifendur.

Það er mikill áhugi á myndasögugerð í dag, það eru ofboðslega margir að teikna – bæði stelpur og strákar. Mér finnst gaman að Blek hafi verið hluti af stórri hræru sem margir tóku þátt í, líka Úlfhildur Dagsdóttir sem opnaði myndasögudeild á bókasafninu, það er margt í gangi.“

Jean gefur sjálfur út klassískar myndasögubækur eins og Ástrík, Viggó, Sval og Val og fleiri undir merkjum útgáfunnar Frosks. Fleiri upplýsingar um það má nálgast á vefnum myndasogur.is og hægt að skrá sig í áskrift á Neo-Bleki þar. Sýningin stendur nú yfir í Borgarbókasafni í Grófinni.