Sagði vinnubrögð Pírata grafa undan tiltrú á stjórnmálin

Árni Páll Árnason, þingmaður Samfylkingarinnar, gagnrýndi Pírata harðlega á Alþingi í dag. Þá beindi hann máli sínu sérstaklega að prófkjöri flokksins í Norðvesturkjördæmi. Hann sagði Pírata ekki geta gengið svona fram og í senn lesið öðrum lexíur um persónuvernd, gagnsæi, upplýsingaöryggi og réttar leikreglur lýðræðisins.

„Ég verð að segja að mér er brugðið við fréttaflutningi af því gerræði og því virðingarleysi fyrir réttum leikreglum lýðræðisins sem hefur birst í prófkjöri Pírata í Norðvesturkjördæmi,“ sagði Árni Páll undir liðnum Störf þingsins á Alþingi í dag.

Hann sagði talsmann Pírata hafa komið fram í viðtali og sagt að „samkvæmt þeim tölfræðigögnum sem voru birt um kosninguna, þá kusu 18 af þessum eingöngu hann og engan annan í prófkjörinu.“

Þetta sagði Árni Páll vera hrikaleg ummæli. Annaðhvort hafi Píratar brotið gegn grundvallarreglum lýðræðisins um frjálsar kosningar og gegn skýrum ákvæðum laga um persónuvernd með því að hafa atkvæði fólks rekjanleg. Annars væri talsmaður flokksins að bera út róg um einstaka þátttakendur í lýðræðislegri kosningu.

„Hvor skýringin sem er ætti að duga til að dæma þessa stjórnmálahreyfingu úr leik.“

Alvarlegar ásakanir

Ásta Guðrún Helgadóttir, þingkona Pírata, svaraði Árna og sagði ásakanir hans vera grafalvarlegar. Hún sagði að þegar gögnin hafi verið greind hafi verið að afpersónutengja þau og sjá til þess að ekki væri hægt að greina bak hver hefði kosið hvern.

„Við í Pírötum höfum ávallt haldið því til haga að rafrænar kosningar geta aldrei eðlis síns vegna verið leynilegar. Þess vegna höfum við ítrekað talað gegn rafrænum kosningum þegar við erum með atkvæðagreiðslur, þjóðaratkvæðagreiðslur eða kosningar til Alþingis til að mynda, að þær verði aldrei hafðar rafrænar. Þetta er ein af grundvallarforsendum lýðræðisins,“ sagði Ásta.

Hún sagði einnig að Píratar væru að reyna að gera hlutina öðruvísi og hluti af því væri að reyna að þróa kosningakerfi. Það hafi verið hluti af ferlinu frá upphafi.

„Kjördæmisráð ákvað að það skyldi vera staðfestingarkosning á landsvísu þegar kæmi að því hvort heildin öll treysti þessum lista. Er það ekki bara öðruvísi lýðræði? Ég spyr. Þurfum við ekki öll að treysta okkar pólitísku listum, fólki sem gengur til kosninga fyrir Pírata? Megum við ekki stundum reyna að vera með aðeins aðra nálgun á það hvernig við stundum lýðræði? Minna lýðræðislegt, meira lýðræðislegt en við gerum okkur fullkomlega grein fyrir því að rafrænar kosningar geta aldrei verið fullkomlega leynilegar.“

Tvenns konar upplýsingar

Helgi Hrafn Gunnarsson, þingmaður Pírata, tók einnig til máls og sagði hann Árna Pál rugla saman tölfræðiupplýsingum annars vegar og persónugreinanlegum gögnum hins vegar. Hann vísaði ásökununum á bug en sagði mikilvægt að taka þessa umræðu þar sem hún væri mikilvæg.

„Þetta er tvennt ólíkt, eins og við hljótum öll að vita. Það eru þekktir gallar við rafrænar kosningar sem enginn hefur verið jafn duglegur að tala um og píratar, þar á meðal í fjölmiðlum og kannski sérstaklega sá sem hér stendur. Þetta eru gallar sem er vel vitað að gera þær óæskilegar fyrir t.d. Alþingiskosningar eða þjóðaratkvæðagreiðslur um til að mynda ESB.“

Helgi sagði rafrænt lýðræði þess eðlis að nauðsynlegt væri að gera tilraunir. Þróuninni þurfi að halda áfram til að ná betri áföngum. Hann sagði Samfylkinguna taka þátt í þessari tilraun með Pírötum og einnig notast við rafræn prófkjör.

„En það væri gleðilegt ef það væri jafn mikil opinber umræða um þau kerfi sem Samfylkingin notar og er hjá okkur. Það er vegna þess að við forðumst ekki þessa umræðu, við þvert á móti fögnum henni. Þess vegna er það mér ljúft að koma hingað og tala um þetta, því að það er mikilvægt málefni.“

Þá benti hann á að það hafi verið Píratar í Norðvesturkjördæmi sem hafi sjálfir sett sér þær reglur sem farið var eftir.