Samtökin 78: góður grundvöllur til framtíðar

Það hefur varla farið framhjá neinum að deildar meiningar eru milli félagsfólks í Samtökunum ‘78.

Í fréttum og á samfélagsmiðlum hefur því verið fleygt fram að innra starf félagsins standi á veikum fótum og að félagið byggi starf sitt á aðgreiningu hópa frekar en samstöðu. Því þykir okkur mikilvægt að rifja upp nokkur verkefni sem stjórnir síðustu ára hafa unnið kröftuglega að og hafa styrkt stöðu og orðspor Samtakanna ‘78.

Glæstar vonir 2013

Mannréttindahátíðin Glæstar vonir var haldin á sama tíma og kirkjuhátíðin Hátíð vonar, þar sem Franklin Graham, yfirlýstur hommahatari, messaði yfir fólki. Glæstar vonir voru vel sótt og falleg athöfn þar sem hinsegin samfélagið stóð saman og mótmælti hatursorðræðu á friðsamlegan hátt.

Starfshópur um ættleiðingar hinsegin fólks 2013

Þrátt fyrir að samkynja pör séu jöfn gagnkynja pörum fyrir lögum á Íslandi er raunin sú að ættleiðingar milli landa hafa ekki staðið samkynja pörum til boða. Óformlegur hópur fólks hafði í nokkur ár unnið að því að gera hinsegin pörum auðveldara að ættleiða börn. Hópurinn varð svo starfshópur innan S‘78 árið 2013. Ýmsir tálmar hafa staðið í veginum en samtökin vinna enn að því að finna leiðir.

Samtökin '78 færa Þjóðarbókhlöðu og Borgarbókasafni bókagjöf 2014

Bókasafn S‘78 var löngum eitt helsta djásn félagsins, enda einstaklega veglegt safn hinsegin efnis. Í seinni tíð hafði notkun á safninu dregist gríðarlega saman með breyttu aðgengi að upplýsingum á vefnum og annars staðar. Til að tryggja að bókakosturinn yrði aðgengilegur félagsfólki og landsmönnum um komandi kynslóðir var brugðið á það ráð að gefa bækurnar almennum bókasöfnum. Hafði Þorvaldur Kristinsson, formaður félagsins til tíu ára og forsprakki bókasafnsins, mikla aðkomu að því ferli. Fræðibækurnar voru gefnar Þjóðarbókhlöðunni og skáldverk og afþreyingarefni Borgarbókasafninu, með því skilyrði að söfnin myndu leggja rækt við safnkostinn og bæta við nýjum bókum um hinsegin málefni.

Tónleikar með tilgang (Úganda) 2014

Í samvinnu við Amnesty International, nemendur í tómstunda- og félagsmálafræði og hinsegin aktivísta í Úganda héldu S‘78 tónleika til stuðnings Farug (Freedom and Roam Uganda), hinsegin félags þar í landi. Komu fram margir af ástsælustu listamönnum þjóðarinnar til stuðnings málefninu. Um milljón króna safnaðist. Það fé hefur runnið beint til samstarfshópsins í Úganda og nýst þar vel.

Hvað er hinsegin? - bæklingur 2015

Útgáfa skriflegs efnis er mjög mikilvæg fyrir félag sem stendur fyrir fræðslu. Árið 2015 var gefinn út fræðslubæklingur bæði á íslensku og ensku þar sem helstu hinsegin hugtökin eru útskýrð á einfaldan og aðgengilegan máta ásamt því að S‘78 eru auglýst. Þessum bæklingi hefur verið dreift við hin ýmsu tilefni.

Hatursorðræða kærð 2015

Á vordögum 2015 tilkynnti Hafnarfjarðarbær áform um þjónustusamning við S‘78 um hinsegin fræðslu til nemenda og ráðgjöf fyrir hinsegin nemendur.

Í kjölfarið spunnust upp hatrammar umræður á netmiðlum þar sem höfð var í frammi orðræða sem flokkast, að mati þáverandi stjórnar og lögfræðings samtakanna, sem hatursorðræða á grundvelli kynhneigðar. Ákveðið var að láta reyna á ákvæði hegningarlaga um slíka hatursorðræðu og voru lögreglunni í Reykjavík bornar tíu kærur. Lögreglan vísaði kærunum upphaflega frá án þess að taka þær til efnislegrar skoðunar og var sú ákvörðun lögreglunnar kærð til ríkissaksóknara. Saksóknari úrskurðaði að lögreglunni væri skylt að taka við þessum kærum og stendur rannsóknin nú yfir.

Nýtt húsnæði 2015

Árið 2012 var sett á laggirnar húsnæðisnefnd til að skoða úrræði varðandi húsnæði félagsins. Ýmsar ástæður þóttu til þess að athuga aðra kosti en húsnæðið á Laugavegi 3, þar á meðal aðgengi, fyrirhugað viðhald, sýnileiki félagsins og fjármál þess. Á aðalfundi 2014 var stjórn veitt umboð til þess að ganga frá kaupum á nýju húsnæði að Suðurgötu 3 í Reykjavík, ásamt því að selja húsnæði Samtakana að Laugavegi 3. Í kjölfarið var húsnæði samtakanna á Laugavegi 3 selt og kaup fest á Suðurgötu 3, og hafa Samtökin ‘78 verið skuldlaust félag síðan.

Nokkurn tíma tók þó að flytja í nýtt húsnæði, ýmsar óvæntar tafir urðu, og langvarandi húsnæðisleysi var félaginu óneitanlega þungbært. Það var því með mikilli gleði sem nýjar höfuðstöðvar voru opnaðar í október 2015. Segja má að félagsstarf S78 hafi blómstrað eftir opnunina, enda mörg sem farið var að þrá skjól yfir þá viðamiklu starfsemi sem S78 býður upp á. Húsnæðið hefur einnig fengið nýtt og spennandi hlutverk sem listagallerí. Í Gallerí ‘78 er sýnd list hinsegin listafólks og er sýningarrýmið fullbókað fram til 2019.

Opin hús

Á Samtakamættinum, þjóðfundi hinsegin fólks sem haldinn var vorið 2013, var sérstaklega kallað eftir aukinni fjölbreytni í félagslífi S‘78 og minni áherslu á djamm og drykkju. Þetta hefur verið haft að leiðarljósi frá opnun húsnæðisins að Suðurgötu 3. Opin hús með fjölbreyttri dagskrá hafa verið haldin á hverju fimmtudagskvöldi, utan stutt sumarfrí. Hefur það gefist einstaklega vel og hafa kvöldin verið vel sótt, bæði af fólki sem hefur sótt viðburði Samtakanna til margra ára sem og margra nýliða. Haldið er utan um fjölda þeirra er sækja opin hús og er gleðilegt að segja frá því að sjaldan eru það færri en 20 einstaklingar sem sækja opnu húsin. Mikil áhersla er lögð á að bjóða alla gesti velkomna og skapa vinalega stemmningu þar sem öllum bjóðist eitthvað við sitt hæfi

Framkvæmdastjóri í fullu starfi 2015

Árið 2015 var ráðist í erfiðar skipulagsbreytingar. Framkvæmdastjóra til fimm ára og fræðslustýru, sem bæði höfðu verið í hálfu starfi, var sagt upp. Hafist var handa við að auglýsa eftir framkvæmdastjóra í fullt starf, með þeirri von að hægt væri að ráða fræðslustjóra í hlutastarf seinna. Ný framkvæmdastýra hóf störf á hausti 2015. Er það ekki síst hennar fjáröflunarvinnu að þakka að í ágúst 2016 var hægt að ráða fræðslufulltrúa í 40% starf. Stöðugildi starfsmanna hjá samtökunum hafa aldrei verið fleiri. Er þetta til marks um þann sterka grunn sem Samtökin ´78 standa á þessu ári.

102 fræðslufyrirlestrar haldnir 2015

Á árinu 2015 sóttu fræðarar á vegum S´78 alls 47 stofnanir heim og héldu samtals 102 fyrirlestra um hinsegin málefni. Rætt var við nemendur og/eða starfsfólk í 20 grunnskólum, ungmenni í átta félagsmiðstöðvum og starfsfólk í einni, nemendur við níu framhaldsskóla og hópa á níu öðrum vettvöngum, þ.á.m. í Hitt húsið, Vinnuskóla Reykjavíkur, Félag læknanema og hóp skólahjúkrunarfræðinga.

Ráðgjöf Samtakanna ´78

Ásókn í ráðgjöf hjá Samtökunum ´78 hefur aukist mikið undanfarin ár, ekki síst frá unglingum sem eru að stíga sín fyrstu skref sem hinsegin. Teljum við þetta til marks um opnara samfélag þar sem fólk kemur yngra út og er óhræddara við að ræða sín mál. Með aukinni styrkjasókn Samtakanna ´78 hefur, auk einstaklingsviðtala, verið hægt að bjóða upp á stuðningshópa bæði fyrir trans ungmenni og foreldra þeirra. Einnig fékkst nú á vormánuðum 2016 styrkur til að senda tvo ráðgjafa frá okkur til Austurríkis á endurmenntunarnámskeið.

Faglærður starfsmaður í ungliðastarfið 2016

Mikið kapp hefur verið lagt á að bæta umgjörðina í kringum Ungliða S´78, en sífellt fleiri og yngri ungmenni leita til samtakanna eftir félagsskap og stuðningi. Mikilvægur liður í því að tryggja faglega umsjón með starfinu var ráðning starfskrafts sem hefur menntun í tómstunda- og félagsmálafræði og mikla reynslu af því að þróa ungmennastarf. Ráðningin fór fram í samráði við Frostaskjól/Kamp, frístundamiðstöð Reykjavíkurborgar.

Samningur við Hafnarfjarðarbæ 2016 og Reykjavík

Í júní 2015 undirrituðu Reykjavíkurborg og S´78 tvo samninga sem kváðu á um greiðslu borgarinnar til samtakanna sem varða rekstur samtakanna annars vegar og þjónustu hins vegar. Samtals hljóðuðu samningarnir upp á 15 milljónir króna sem dreifast á þrjú ár. Samningur þessi hljóðar uppá tvöföldun fjárframlaga Reykjavíkurborgar miðað við fyrri samning . Einnig undirrituðu Hafnarfjarðarkaupstaður og S´78 samstarfssamning um fræðslusamstarf í desember 2015. Meginmarkmið samningsins, sem tók gildi á árinu 2016, er að auka þjónustu við nemendur og starfsfólk grunnskóla með fræðslu um málefni hinsegin fólks á grunni jafnréttis og sjálfsagðra mannréttinda.

Við undirrituð erum þeirrar skoðunar að mikið og gott starf hafi verið unnið innan félagsins undanfarin ár og teljum það forréttindi að fá að koma að starfi svo öflugs og gróskumikils félags. Við efum þó ekki að rými sé til að gera meira og auka á fjölbreytni þeirra radda sem heyrast innan félagsins. Það er þess vegna sem við viljum bjóða fram krafta okkar aftur. Við erum full af orku og tilbúin í að leiða Samtökin ‘78 áfram, með það að leiðarljósi að félagsfólk fái meira vægi og að þrátt fyrir deilur og átök geti hinsegin samfélagið sameinast um að vera stolt af þeim áfangasigrum sem við erum að vinna enn þann dag í dag.

María Helga Guðmundsdóttir, frambjóðandi til formanns

Unnsteinn Jóhannson, frambjóðandi til varaformanns

Kitty Anderson, frambjóðandi til alþjóðafulltrúa

Júlía Margrét Einarsdóttir, frambjóðandi til ritara