Innlent

Engin áform eru uppi um að opna herstöðina

Stefán Rafn Sigurbjörnsson skrifar

Virt Bandarísk samtök um rannsóknir á varnarmálum leggja til í nýrri skýrslu að herstöð Bandaríkjahers verði enduropnuð á Miðnesheiði.

Skýrslan sem unnin var af Center for strategic and international studies var kynnt Bandarískum stjórnvöldum í síðustu viku fjallar um neðansjávarhernað í Evrópu. Þar eru Bandarísk stjórnvöld meðal annars hvött til að opna varnarstöðina í Keflavík á nýjan leik til að bregðast við auknum umsvifum rússneskra kafbáta í Norður Atlantshafi.

Niðurstaða skýrslunnar svipar til yfirlýsingar sem Lilja Dögg Alfreðsdóttir, utanríkisráðherra, og Robert Work, varavarnarmálaráðherra Bandaríkjanna undrrituðu fyrir skemmstu um aukið varnarsamstarf á milli ríkjanna tveggja.

Gert er ráð fyrir að opnað verði flugskýli undir P-8 Poseidon kafbátaleitarflugvél og að Bandaríkjamenn eigi aðkomu að loftrýmisgæslu en skýrsluhöfundar vilja ganga lengra með því að Bandaríkjaher opni varnarstöðina á nýjan leik.

Lilja Dögg segir slíkar fyrirætlanir þó ekki á dagskrá.

„Afstaða Íslands til öryggismála á norðanverðu Atlantshafi liggur fyrir og var formfest í yfirlýsingu Íslands og Bandaríkjanna í lok Júlí. Þar er gert ráð fyrir tímabundinni veru Bandaríkjahers hér á landi við loftrýmisgæslu og kafbátaleit. Þar var verið að formfesta þróun sem hefur átt sér stað síðan 2008,“ segir Lilja.

Hún segir skýrsluna áhugavert innlegg í umræðuna en hún sé með engu móti stefnumótandi plagg.

„Hún kemur frá sjálfstæðri fræðastofnun og sú stofnun mælir hvorki fyrir Bandaríkjastjórn né Atlantshafsbandalagið. Það getur verið gott að fá og hún getur verið áhugaverð en ekki er um að ræða nokkrar viðræður á milli Íslands og Bandaríkjanna um breytingar á núverandi samstarfi þjóðanna og engar óskir á þá veru hafa heldur borist frá Bandarískum stjórnvöldum. Það er þannig að slík ákvörðun kallar á miklar umræður á Íslandi og engin áform eru uppi um slíkt.“

Er þessi skýrsla vísbending um það sem koma skal?

„Ég lít ekki á þetta sem vísbendingu í þá veru. Öll umræða um öryggis- og varnarmál er af hinu góða og ný þjóðaröryggistefna sem Alþingi samþykkti gerir einmitt ráð fyrir því að auka umræðu um þennan málaflokk og eitt af þeim málum sem ég set í forgang á komandi þingi er þjóðaröryggisráðið og ég held að það sé farsælt að nýta þann vettvang fyrir þá umræðu,“ segir hún.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.