Sextugt er bara ekkert orðið

„Já, sumir telja þetta stórafmæli en sextugt er bara ekkert orðið, ég er að hugsa um að gera ekkert merkilegt úr því, halda bara upp á áttræðisafmælið, ef og þegar að því kemur,“ segir Árni Sigfússon stjórnsýslufræðingur og bendir á að tækni, lífskjör og aðstæður geri fólki kleift að lifa lengur en áður.

Árni býr á Suðurnesjum þó hann sé ekki lengur bæjarstjóri og starfar nú með eiginkonunni Bryndísi Guðmundsdóttur talmeinafræðingi. „Við Bryndís fórum saman í Kennarakólann á sínum tíma og höfum alltaf haft áhuga á menntun og tækifærum til náms. Starf hennar að því að auka getu barna til að tjá sig hefur þróast í náms-og þjálfunarefni allskonar sem við erum að hjálpast að við að koma á framfæri. Ég hef líka verið að vinna með frumkvöðlum, aðallega hér á Suðurnesjum, að uppbyggingu fyrirtækja, veita þeim ráðgjöf og nýta þá reynslu og þekkingu sem ég hef safnað. Svo auðvitað sinni ég barnabörnunum, nú eru þau orðin fjögur, sumir segja að það sé ekkert, en miðað við hvað maður vandar sig við þetta þá tekur það sinn tíma. Þetta er skemmtilegt líf.“

Eftir kennaranámið fylgdust þau Árni og Bryndís að til Bandaríkjanna í nám, hún í talmeinafræði og hann í stjórnsýslufræði. „Hvorugt okkar fór svo í hefðbundna kennslu. En ég byrjaði samt ungur að kenna, var stundakennari í Vogaskóla fljótlega eftir að ég byrjaði í MH. Líkaði það vel, pabbi var kennari og afi skólastjóri svo þetta var í blóðinu.“

Eins og fram kom í upphafi hefur Árni ekki í hyggju að halda veglega upp á afmælið í dag. „En af því ég er Vestmannaeyingur og finnst alltaf Eyjar vera „heima“, hugleiddi ég aðeins að standa í hliðinu inn í Herjólfsdal og undrast hversu margir kæmu í afmælið mitt - en hvarf svo frá því! Þeir sem mæta á þjóðhátíð geta samt haft í huga að þeir séu að koma í afmælið mitt þó ég sé ekki á staðnum!