Lagarde mun þurfa að mæta fyrir rétt

Christine Lagarde, forstóri Alþjóðagjaldeyrissjóðsins, hefur verið ákærð vegna máls sem snýr að greiðslu franska ríkisins til franska auðjöfursins Bernard Tapie.

Lagarde gegndi embætti fjármálaráðherra landsins á þeim tíma sem greiðslan var samþykkt.

Áfrýjunardómstóll kvað upp úrskurð sinn í dag, en Lagarde hafði áður áfrýjað úrskurði annars dómstóls frá í desember.

Lagarde hefur verið ákærð fyrir vanrækslu í starfi, en Tapie voru greiddar 404 milljónir evra, um 54 milljarðar króna, í tengslum við sölu Tapie á íþróttavörumerkinu Adidas. Ríkisbankinn Credit Lyonnais hafði milligöngu um söluna og kvað Tapie bankann hafa svikið sig um háar fjárhæðir þegar salan fór fram á tíunda áratugnum.

Í frétt BBC segir að nú sé búist við að Lagarde mæti fyrir sérstakan dómstól fyrir ráðherra ríkisstjórnar.

Lagarde bar ábyrgð á að hafa skipað gerðardóm í stað þess að leita til dómstóla til að ná niðurstöðu í málinu. Lagarde hafnar því að hafa gert nokkuð rangt og ætíð haft hagsmuni franska ríkisins að leiðarljósi.